RESUBELPARA: World Tuberculosis Day-ko maniani bak gita Mongolbar salo, 100 Days Tuberculosis (TB) Free Meghalaya Campaign-ko North Garo Hills a·jani Bajengdoba Block ning·o donggipa Narongkol songo a·bachengataha.
Ia program-ko East Garo Hills a·jani District TB Control Society, TB saaniko chel·chakna, seng·gnang porikka ra·e ma·sina aro chu·gimik sanna bananiko ra·na gita manderangna u·iatna miksonganio ong·ataha.
Ia program-ko ong·atanio, North Garo Hills a·jani District Medical & Health Officer (DM&HO) Dr Priya Sengse R Sangma, mongsonggipa sokgipa ong·e, jinmana aganprakangengon, TB saaniara chu·gimik nampilna man·gipa sabisisa ong·a ine TB saaniko ta·raken porikka ra·e, somoi gita sanna bananiko ra·na nangani gimin agan-talatanirangko on·angaha.
Gusu, sko saani, walo kramchi ong·ani aro be·en cheng·roroaniko man·on an·tangtangni sepangbatgipa health centre-rangona re·ange sanna bananirangko ra·china gitaba ua, jolo songdongenggipa manderangko didiangaha.
TB sagiparangna indin porikka ra·ani, sanna banani aro cha·anirangko on·enggipa sorkarini dingtang dingtang scheme-rangni giminba Dr Sangma talatanirangko on·angaha aro TB saaniko bon·atna kam ka·anio bakrimchina pilakkon didiangaha.
Ia program-ko ong·atanio, East aro North Garo Hills a·jani District TB Officer Dr Chrissie Pearly Sangma, ‘Yes! We Can End TB’ ba ‘Oe, An·ching TB-ko gimaatna man·gen’ ine on·gimin pangchakani bidingo agan-talatanirangko on·angskaaha.
Ia program-ko ong·atanio, TB saaniko bon·atna kam ka·anio chu·sokgipa ong·ahani gimin Gold, Silver aro Bronze gadangrango, dam 11 songrangna TB Mukt Village Award-rangkoba on·angjolaha.
TB saaniko 2030 bilsini gisepon bon·atna gitaba ia tom·anio bak ra·giparang jinma ku·mikchetangaha.
Ia program-ko ong·atanio dongpae jinmana aganprakanggipa gipin manderangara, Dr Rezia Sangma, Dr Cherubie Sangma, Dr Salmera Momin aro gipin medical officer-rang ong·a.
