Porikkarango teng·sugipa chatro chatrirangna IT Award-rangko on·a

SHILLONG: Dingtang dingtang porikkarango teng·sugipa chatro chatrirangna boksisrangko on·e mande ra·pilskaaniko dakna gita Budbar salo, Meghalaya IT Awards 2026-ko Shillong songjinmani U Soso Tham Auditorium-o ong·atangaha aro ia program-ko ong·atanio, dingtang dingtang porikkarango teng·sugipa sak 203 chatro chatrirangna a·dokni Chief Minister Conrad K Sangma, laptop-rangko sualataha.
Ia chatro chatrirangara, MBOSE, CBSE aro ICSE-ni Class 10 aro Class 12 porikkarango nambatgiparang ong·e chu·sokgiparang ong·a aro uamangoni sakgnide, be·enni gita cholgri ong·gipa ong·a.
Ia Meghalaya IT Awards program-ko ong·atanio a·dokni Chief Minister, tom·anio bak ra·giparangna aganprakangengon, ia laptop-rangara boksismangmangsan ong·aija indiba ian chatro chatrirangni chu·sokgipa ong·anio sorkarini ka·donganiko mesokaniba ong·enga ine aganaha. Technology-ko jakkale, Meghalaya a·dokni dal·roroanio on·gilpaengon, a·gilsakni cholrangkoba ra·china gita Chief Minister, chatro chatrirangko didiangaha.
Philadelphia songjinmani Wharton School of the University of Pennsylvania-o an·tangni poraiani ja·man tikkelbaaniko gisik ra·atpilengon, ua somoirango chatro chatrirangna maming dakchake on·ani cholrang dongjani giminsa da·alo sorkari, bading chiwalani, changa sapani aro u·i-ma·sianirangko nambatatna gisik on·e kamko ka·na a·bachengaha ine Chief Minister parakataha.
Ia program-ko ong·atanio, a·dokni Education Minister Lahkmen Rymbui-ba jinmana aganprakangengon, ia gital chasongo, digital literacy ba technology-ko ma·sie ra·aniara baseani chol ong·jaha indiba mongsonggipa bakan ong·aha ine chatro chatrirangko, technology-rangchi an·tangtangni u·i-ma·sianirangko bariatchina didiangaha.
2013 dipetan Meghalaya a·doko UPSC Civil Service porikkao chu·sokanirang komiroroangaha ine an·tangni suk ong·gijaniko parakatengon, mikkangchi a·songo nambatgiparang ong·na gita tikkelchina Education Minister, chatro chatrirangko didiangaha.
Official-rangni u·iatani gitade, 2007 bilsio a·bachengatgipa Meghalaya IT Awards-ara, a·doko chatro chatrirangni technology-ko skie ra·anio gisik nangbatatna aro pilakkon technology-o man·gopatna miksonge ra·gatgipa program ong·a.
Ia bilsio Meghalaya IT Award-ko man·gipa chatro chatrirangoni sak 131-de MBOSE-ni porikkao chu·sokgiparang, sak 51-de CBSE aro sak 21-de ICSE-ni porikkao chu·sokgiparang ong·a.