TURA: Ia sal somoirango chadamberangni drugs ba pekatgipa samrangko jakkalanirang batroroengani gimin chadamberangna mikrakataniko on·na aro an·seng baljoke janggi tangchina didina gita Budbar salo, Morning Football Club, Meghalaya sorkarini Drug Reduction Elimination & Action Mission (DREAM) program-ni dakchakanichi Drug Awareness program aro Friendly Football Match-koba Tura-ni Chandmari kal·chakramo ong·atangaha.
Ia program-ko ong·atanio, dingtang dingtang skulni chatro chatrirang, chadamberang, aro ramram manderangba bak ra·angtokaha.
Ia program-o East Garo Hills a·jani Deputy Commissioner RP Marak, mongsonggipa sokgipa ong·e jinmana aganprakangengon, ia program-ko ong·atahani gimin mittelpilangenba, chadamberangko nama ramao dilna aro name janggi tangatna gita kal·susaaniba nambatsranggipa cholrangoni mingsa ong·a ine aganaha.
Ia tom·anio West Garo Hills a·jani ADM Rosalinda Shira-ba dongpae jinmana aganprakangengon, DREAM program-ko a·bachengatani miksonganirangko agan-talate on·angenba, ian a·doko drugs jakkalaniko bon·atna gita sorkarini a·bachengatgipa program ong·a ine ia program-o bakrimchina gita pilakkon didiangaha.
Ia awareness program-ko ong·atanio, pekatgipa samrangko jakkalanichi maikai mandena ong·sianiko aro namgijaniko ra·bana man·a, uarangni gimin Tura Civil Hospital-ni Counsellor Bilrak D Marak, Tura Police-ni Circle Inspector Bitching N Marak aro Garo Baptist Convention-ni ning·o donggipa Youth Department-ni Director Rev Durasal R Marak, agan-talatanirangko on·angaha.
Ia program-o East Garo Hills a·jani ADM Reuben Ch Momin, PWD-ni gitcham Chief Engineer Bruce P Marak, Sports & Youth Affairs-ni gitcham Deputy Director Jasper P Marak aro gipinrangba dongpae bak ra·angaha.
Ia awareness program-ko ong·atani bak gita dingtangmancha Tura Legends aro Williamnagar Legends dolni gisepo robol kal·susaanikoba ong·atangaha aro ia kal·susaanio Tura Legends chegipa ong·aha.
