SHILLONG: Electoral roll-rangko ta·raken Special Intensive Revision (SIR) dakchina aro Constitution (Scheduled Tribes) Order 1950-ko taridapchina gita Confederation of Meghalaya Social Organisations (CoMSO), a·dok sorkariko didiangaha.
Iani bidingo a·dokni Chief Minister Conrad K Sangma-na sedoatengon, electoral roll-rangko SIR dakna aro niamrangko taridapna gita sal 45 somoiko a·dok sorkarina on·angenba, ia salrangni gisepo ia kamrangko chu·sokatjagenchimode jingjengatna a·bachengatgen ine CoMSO, mikrakataniko on·angaha.
Chief Minister-na sedoatgipa chittio CoMSO-ni chairman Roy Kupar Synrem-ni parakatani gitade, Meghalaya a·dokni Tribal jatrangko chel·chakna gita electoral roll-rangko ta·raken SIR dakna nangenga aro Constitution (Scheduled Tribes) Order 1950-koba taridapna nangenga.
A·doko electoral roll-rangko SIR dakna gita ta·raken Election Commission of India (ECI) baksa agangrikatchinaba ua, a·dokni Chief Minister-ko didiataha.
“Meghalaya a·dokara Tribal-rangni a·doksa ong·a indiba gipin biaprangoni re·napbae songdong a·chaenggiparangna aro iandakgipa manderangko electoral roll-rangko segatna bang·en kenchakna nanganirang donga. A·doko songdongkamgipa manderangkosan electoral roll-rango segatna gita Special Intensive Revision-ko dakchina chinga a·dok sorkario dabienga,” ine Synrem aganaha.
Constitution (Scheduled Tribes) Order 1950-ko taridapna nangengani gimin janapatskaengon, ia niamko gipin Tribal-rang ma·sisretjachina aro Meghalaya a·dokni Tribal-mangmangkosan iano segatna gita ia niamko taridapna nangenga ine CoMSO chairman aganaha.
