Matnanggiparangni kosako FIR ka·pangpila
TURA: East Garo Hills a·jani Chiading jolo donggipa Dorakgre a·kingni Nokmako niam gri songa ine matnange an·tangni kosako FIR ka·anina Garo Hills Autonomous District Council (GHADC)-ni gitcham Deputy Chief Executive Membor Nikman Ch Marak jegalatenba, an·tangni kosako matnanggipa manderangni kosako FIR ka·pangpilaha.
FIR-ko ua, Chokpot Police Station-ni officer-in-charge-na ka·angaha.
GHADC-ni gitcham Deputy CEM Nikman Marak, Tantul M Sangma aro Renubala T Sangma minggipa manderang baksa, Dorakgre A·kingna sakgipin mandekosa Nokma songskaaha ine matnangenba adita salrangna skangsan an·tangko Dorakgre a·kingni Nokma ine a·kanggipa Rikme T Sangma, Chiading police station-o FI ka·angahachim.
Uni ma·a paa sian intalan uasa a·king Nokma ong·e GHADC-o segatako man·ahachim ine janapatengon, GHADC-ni gitcham Deputy CEM, niamko ja·rikgija, maming u·iatchengani gri, inquiry dakani gri ba Mauzadar report gri 2026 bilsini February 27 tariko kosako janapgipa manderangko Nokma songaha ine Rikme T Sangma, FIR-o janapahachim.
Indake ong·engon, an·tangni kosako matnanganirangko gitcham Deputy CEM Marak jegalatskaenba, uni kosako matnanganirangara maming pangchakani grigipasan ong·aia aro ia obostani bidingo uko matnangna aro cholko ra·na dakanisan ong·aia ine FIR-o parakataha.
“2026 bilsini February 27 tariko, angni Deputy CEM ong·engmitingo, ia case-o angona ra·bagipa record-rang aro lekkarango pangchake Nokmako biming segataniko anga ra·chake, order-ko pass ka·aha. Indiba Dorakgre songni Rikme T Sangma, ia order-ko nipiltaichina sedoani pal, ia order ba ge·etaniko on·anina kusi ong·jae, angni kosakosa FIR ka·skaaha,” ine GHADC-ni gitcham Deputy CEM parakataha.
“Ia mandeni FIR ka·aniko songbadrango aro social media-rango gipatahani gimin ian manderangona aro angni constituency-ni ning·oba sokangahani a·sel ian angni dilgipa ong·e kam ka·anio angni bimingko ong·siatani gita ong·aha,” ine GHADC-ni gitcham Deputy CEM aro Rongrikimgre constituency-ni MDC janapatenba, ia mande aro ia kamo jak donggipa gipin manderangni kosako mokordomako segatchina police-rangko didiataha.
Ia obostani bidingo kakketko ma·sina gita ta·raken sandirokchina aro uni kosako iandake sinjetanirangko chel·chakchina gitaba Marak didiataha.
