SHILLONG: Re·anggipa Sonibar salo, Khasi National Awakening Day-ko maniani bak gita Khasi Students Union (KSU)-ni re·jomaniko ong·atengmiting somoio, biap damsaoni ma·sina man·gijagipa manderangni ro·ongrangchi goani ja·man dolgnini gisepo adita so·sojengjeng ong·aniko nikna man·angaha.
Ia Khasi National Awakening Day-ko bilsiantian KSU, 1829 bilsio U Tirot Sing-ni dilanichi British-rangni kosako warachakaniko gisik ra·e manirongenga indiba ia salko maniani bak gita re·jomaniko ong·atengmiting somoio Laban jolo, ma·sina man·gijagipa dolsa manderang, re·jomenggipa manderangko ro·ongrangchi goani ja·man adita so·sojengjeng ong·aniko nikna man·aha.
Koborko on·ani gitade, KSU-ni jinma re·jomaniko ong·atengmiting somoio Laban jolo donggipa bang·a dokkanrangan chipe dontokaha indiba gipin biaprangode pangna dakrongbewal gitan dokkanrangko kulitokaiaha.
Jinma re·jomaniko ong·atengmiting somoio so·sojengjeng ong·anirangko chel·chakna gita mongsonggipa biaprangon bang·en sipai dolrangkoba donattokaha.
Mikrontangchi nikgipa manderangni u·iatani gitade, jinma re·jomengmiting somoio, sambao donggipa nok te·saoni dolsa manderang ro·ongrangchi goataha aro uni ja·man KSU-ni mitam membor-rangba ro·ongrangchi gochakskaaha.
Ia a·sel ong·ani ja·man ta·raken KSU-ni dilgiparang, police-rang aro volunteer-rang, ia obostako namatpilna man·aha aro ia re·jomaniko ja·mano maming a·sel grian tom·tome matchotatna man·aha.
Ia salko maniani bidingo KSU-ni gitcham president aro North East Students Organisation (NESO)-ni chairman Samuel Jyrwa, kobor ra·timgiparangna talate on·angengon, 1993 bilsio KSU-ni constitution-ko ra·gatchengani somoio ia Khasi National Awakening Day-ko bilsiantian April jani 4 tariko, Khasi aro Jaintia manderangko mikrakatna gita manirongenga ine parakataha.
Batanggimin bilsirangoba ia National Awakening Movement Day-ko maniani bak gita KSU-ni re·jomanirangko ong·atanio, bak ra·gipa mitam manderang ramarango ong·gija kamrangko ka·ani a·sel so·sojengjeng ong·anirangko nikna man·ahachim.
