TURA: Sombar salo, Easter-ni salko gisik ra·ani bak dake jinma chiringrango pinic-ko cha·ni somoio Garo Hills-ni damgittam dingtang dingtang biaprango a·sel obostarang ong·enba sakgni chadamberang chio sripe siaha aro gipin gari asel ong·e bilongbee saknaa man·aha.
Indake skanggipa a·sel ong·anio, bilsi 14-san ong·kuenggipa Yowin Salchado M. Sangma, Sombar saljatchini bako Sella Wario roengmiting somoio chio sripe janggitangko gimaatna nangaha. Indake sianggipa chadambeni manggisiko adita somoina sandiani ja·mano man·pila. Ua, Tura Dakopgre-ni MeCL Complex-o donggipa Nikrang D. Sangma aro Monila M. Sangma-ni saksa kamkam depante ong·achim.
Minggipin koborko man·soani gita, sakgipin bilsi 18 ong·gipa chadambe, Rongdep Adinggre songni Dedan D. Sangma, salni 3 bajimango Damring chibimao jroe roengmitingo chio sripe siaha. Ua Purno B. Marak-ni depante ong·achim. Indake ong·engon, police dolni a·sel ong·gipa biapona sokbana Dedan-ni manggisiko uni ma·drangrang chioniko sandie man·pilahachim ineba koborko man·aha.
Una agreba apsan salni gisepon, Selbagre jolo Mahindra pick-up garichi salpaka man·e sakgni manderang bilongbee saknaaniko man·aha aro kobor man·soani gitade Mahindra Pick-up-ni driver manderangko salpakenba a·sel ong·gipa a·damoni katahachim. Police-ni koboro gita, salpaka man·gipa manderang bilongbee jokkom ong·tokaha.
