Embee Rosebud aro Pechon Memorial skul GH-na mikkim rasongko ra·baa
TURA: Secondary School Leaving Certificate (SSLC) porikkani result-rangko Mongolbar salo, Meghalaya Board of School Education (MBOSE) parakataha aro ia bilsini SSLC porikkao Tura-ni Embee Rosebud Higher Secondary School aro Pechon A Sangma Memorial Police Public Secondary School-ni chatro chatrirang, Garo Hills-na mikkim rasongko ra·baaha.
Ia bilsini SSLC porikkao Garo Hills-oni gimik saksku chatro chatrirang, Top 20-o biapko man·e chu·sokgipa ong·aha aro uamangara Top 20-ni gnigipa biapo Embee Rosebud HS School-ni Vishal Kumar (576 marks), gittamgipao Pechon A Sangma Memorial Police Public Sec School-ni Prinita Das (575 marks), dokgipao A Regular-II candidate Mehek Islam (570 marks), 10-gipao A Regular-II candidate Emalton D Marak (565 marks), 11-gipao Pechon A Sangma Memorial Police Public Sec School-ni Tushar Das (564 marks), 16-gipao Garobadha Nirupama Memorial Secondary School-ni Deep Jyoti Koch (559 marks), 18-gipao Pechon A Sangma Memorial Police Public Sec School-ni Pragati Gupta (557 marks), 19-gipao Tura Sherwood School-ni Adiel R Sangma (556 marks) aro 20-gipao Tura Sherwood School-ni Churchill Leithanthem (555 marks) ong·a.
Ia chang SSLC porikkako Garo Hills gimikoni sak 18,852 chatro chatrirang seahachim aro ianoni sak 14,479 chatro chatrirang chu·sokgipa ong·na man·aha.
Garo Hills gimiko SSLC porikkako seanio pass ka·ani percentage-ara ia bilsio 76.8% ong·aha aro re·anggipa bilsio 80% ong·aoni adita komibatskaaha.
SSLC porikkao district-ni gita pass ka·ani percentage-ranga East Garo Hills-o 72.3%, West Garo Hills-o 77.8%, South Garo Hills-o 88.4%, South West Garo Hills-o 74.5% aro North Garo Hills-o 72.7% ong·a.
