FCRA Amendment Bill-ko pass ka·na skang name nipilchina ma·mong sorkariko didia

NEW DELHI: Budbar salo, a·dokni Chief Minister Conrad K Sangma-ni dilanichi, Catholic Bishops Conference of India (CBCI)-ni dilgiparang, Union Minority Affairs Minister Kiren Rijiju-ko New Delhi-o grongenba, Foreign Contribution Regulation Act (FCRA) Amendment Bill-ko pass ka·na skang, dingtang dingtang dolrang baksa chanchirimchengchina gita didiangaha.
Union Minister-ko grongani ja·man kobor ra·timgiparangna talataniko on·angengon, Meghalaya aro salgro salaramni gipin a·dokrango, mongsongbate Tribal a·jarango gipin a·songrangni dakchake on·enggipa institute-rangan, lekka pora, an·seng baljokani aro songsalna dangdike on·enggiparang ong·ani gimin FCRA-ko taridapanio mitam niamrangara iandakgipa kamrangko champengani gita ong·anga ine a·dokni Chief Minister aganenba, iani bidingo FCRA Amendment Bill-ko pass ka·na skang name nipilchina aro dingtang dingtang dolrang baksa chanchirimchengchina ma·mong sorkariko mol·molangaha ine parakataha.
FCRA-ko taridapgipa adita niamrangni gimin janapangengon, ia Act-o on·dapgipa mitam kattarangara, ‘gam-jinrangko rim·na’ dongimin niamrangba dongani gimin Kristian dolrang aro civil society organization-rangni gisepo jajrengchakani ong·katenga ine Chief Minister parakataha.
“FCRA-ko taridapanio mitam niamrangara, gam-jinrangko rim·ani bidingo janapahani gimin bang·a Kristian dolrangan jajrengchakaniko paraktokenga, uni giminsa pilakni namgninan apsan chanchirimchenge ja·kuko de·china chinga ma·mong sorkariko didiaha,” ine Sangma aganaha.
Dingtang dingtang Kristian ma·malrang, gipin a·songrangni dakchakanichi, songadam nokadamrango, mongsongbate diltubatsranggipa biaprangonaba re·ange, manderangna dangdike on·engani gimin iandakgipa dolrangkoba mande ra·na nanga ineba Chief Minister aganaha.
Chief Minister-ni parakatani gitade, uamangni agananirangko knatime ra·ani ja·man, FCRA Amendment Bill-ko ra·chakna skang name nipiltaina gita Union Minority Affairs Minister Kiren Rijiju-ba ku·rachakaniko on·ataha.
“Ia taridapgipa niamrangko pass ka·na skang, apalbate chanchirimchengna aro ia chanchirimanio pilakkon bak ong·atna Union Minister ku·rachakaha aro iana anga dingtangmancha uko mittelna ska,” ine Sangma aganaha.
Union Minister Kiren Rijiju-ko grongeanio, a·dokni Chief Minister baksana Deputy Chief Minister Prestone Tynsong, CBCI-ni President Anthony Cardinal Poola, Secretary General Anil Joseph Thomas Couto aro gipin dilgiparangba dongpaaha.