Sorkari college-rango fee bariatna tik ka·anide ku·pattianisan: Edu Minister

SHILLONG: Meghalaya a·dokni sorkari college-rango fee-rangko bariatna tik ka·anide ku·pattianisan ong·aia aro fee-rangko bariata bariatjanide college-rangni jakosa ine a·dokni Education Minister Lahkmen Rymbui talataniko on·angaha.
Meghalaya a·dokni pilak biaprangon government ba sorkari college-rango fee bariatna gita a·dok sorkarini tik ka·aniko adita salrangna skang, Hynniewtrep Youth Council (HYC)-ni education cell jegalatenba, sorkari college-rango fee-rangko bariatgenchimode jingjengatna draatako man·gen ine mikrakataniko on·angani ja·man iani bidingo Education Minister talataniko on·angaha.
HYC-ni sorkariko matnanganina aganchakaniko on·angengon, “Meghalaya sorkari, pangnan chatro chatrirangni namgnikosa mikkango donronga. Post-matric scholarship-ba indin suale on·anisa ong·a aro chinga iako bariataha,” ine Rymbui aganaha.
Sorkari college-rango fee-rangko bariatna tik ka·aniara chatro chatrirangna aro ma·a paarangnaba maming nangchakeaniko ra·bajawa ineba ua aganaha.
“Chatro chatrirang aro dingtang dingtang dolrang nangnikgenchimode iako chu·sokatna man·aigen. Scholarship-rangko man·ani ja·mansa bariatgimin fee-ko gamna nangaigen indiba uamang scholarship-ko man·jagenchimode gamna nangjawa,” ine Education Minister aganaha.
Iandakgipa ja·kuko de·aniara college-rangna jakgitelaniko on·na miksonganisa ong·enga aro an·tangtangni kamrangko an·tangtangan ka·chinasa ong·enga ineba ua aganaha.
“College-ko chalaienggipa managing committee-rang, principal-rang, students union-rang aro skigiparang an·tangtangan an·tangtangni college-na maia nambata uko nie ja·kuko de·china chinga pakwatenga,” ine Rymbui aganaha.
Sorkarini ku·pattianiko ma·sisretjachina gita dingtang dingtang dolrangko didiatengon, “Ia tangkarang sorkarini sundukona re·angjawa indiba uamang (college) an·tangtangan chalaina nanggen,” ine Education Minister parakataha.
Sorkari college-rangni fee-ko bariatna sorkarini tik ka·aniara, chatro chatrirangna neng·nikaniko ra·bana ja·ku de·ani gitasa ong·enga ine adita salrangna skangsan HYC jegalatenba, sorkari college-rango fee-ko bariatgenchimode, cholgri ong·pagipa nokdangrangoni chatro chatrirangnade neng·nikaniko ra·baani gita ong·gen aro uamangni chubata gadangrango poraianiko champengani gita ong·gen ine parakatahachim.
Sorkari college-rango fee-rangko sorkari bariatbebegenchimode college-rango poraianiko dontonggipa chatro chatrirang batrorognok aro chubata gadangrango poraiangna chol ong·jae, a·dokni lekka porana nangchakeaniko ra·baani cholrang donga ineba HYC parakatahachim.