TURA: Batanggimin sal somoirango, Garo Hills-o so·sojengjeng ong·engmiting somoio bakrimanirangko on·ahani gimin Khasi-Jaintia jong-ada, no-abirangko Niksamso Garo Community Organisation (NGCO) mittelpilangaha.
So·sojengjeng ong·engmiting somoirango bakrimaniko on·ahani gimin Khasi-Jaintia jong-adarangko mittelpilangengon, “Na·simangni ku·mong nangrimaniko on·aniara a·doko ku·cholsan ong·ani aro jong-ada ong·ani chinko mesokani ong·aha aro ian an·ching jatrangni gisepo kakket bichalna, tom·tomanina aro saksa sakgipinko mande ra·grikna on·kanganiko mesokaniba ong·aha,” ine NGCO parakataha.
“Chingni neng·nikanirangko chagrongengmiting somoio bakrimaniko on·aniara chinga saksan ong·ja ine chingko gisik ra·ataniba ong·aha. Garo aro Khasi jatrang, pangnan meli-nangrimaniko rakkigiparang ong·a aro da·alo ia meli-nangrimaniara, saksa sakgipinko ma·sichakgrikanichi, mande ra·grikanichi aro nangan salo dakchakgrikanichi bilakbataniko mesokaha. An·ching dingtang dingtang jatrang ong·genchimoba, an·chingni a·arangko, an·tangtangni jat ong·aniko aro an·tangtangni bilrangko chel·chakanio ku·cholsan ong·giparang ong·a,” ine NGCO parakataha.
Mikkangchiba Meghalaya a·dokni manderang, an·tangtangni bilrangko chel·chakanio aro ku·cholsan ong·anian bil ine mesokanio apsan bakrimangkugen ineba NGCO, ka·dongchakenganiko parakataha.
