Kam ka·gija dormaha oke cha·enggiparangko EC mikrakata
TURA: Garo Hills Autonomous District Council (GHADC)-o dingtang electoral roll-ko tarina ja·kuko de·ani bak gita gital Delimitation Committee-ko dilna mande sakbriko seokaha ine GHADC-ni Executive Membor (EM) aro Garo Hills United Alliance (GHUA)-na ku·wattimgipa Cherak W Momin parakataha.
Momin-ni parakatani gitade, GHADC-ni gital Delimitation Committee-ko dilna, MPSC-ni gitcham membor Bebema T Sangma-ko chairperson-na, GHADC-ni Tourism Officer Briten A Sangma-ko Secretary-na aro ABDK-ni gitcham Vice President Brenethson R Marak baksana gitcham MCS officer Proley M Sangma-ko membor dake songaha. Ia gital Delimitation Committee, jadokni gisepon GHADC-ni Executive Committee-na an·tangtangni ku·pattianirangko on·anggen ineba Momin parakataha.
GHADC-ko gital dake tariani bidingo janapatengon, GHADC-o gitcham Executive Committee-ni maming advertisement gri aro interview-rangko ra·ani gri kamo ra·gipa sak 29 manderangko ra·galpilna gita gital EC tik ka·aha ine Momin parakataha. Momin-ni u·iatani gitade, ia manderangara, LDA, chainman, hill mondol, typist, sentry, mondol aro gipin kamrango niam gri rakkia man·giparangsa ong·achim.
Forest guard, peon, cleaner, chowkidar aro uandakgipa kamrangko man·chape sak 39 casual employee-rangko gitcham EC-ni regularize ka·na u·iatgipani gimin janapatskaengon, ia kam ka·giparangni bidingo am·sandianirangko dake, uamangna bate kamo bilsi ru·utbatgipa casual employee-rangkon nichalgalaha ine nikahani gimin gitcham EC-ni on·gipa regularization order-ko den·galpilna tik ka·aha ine Momin parakataha.
GHADC-o je manderangan, kamrangko ka·gija dormaha oke cha·engachim, uandakgipa manderangkoba gital Executive Committee, kamtangtangko name ka·china, ong·jaode kamtangtangko watchina mikrakataniko on·ataha.
