TURA: Chief Minister’s Career Guidance & Counselling Scheme-ni ning·o dingtangmancha Career Guidance program-ko Bristibar salo, Tura-ni District Auditorium-o ong·atangaha aro ia program-ko ong·atanio, West Garo Hills a·jani dingtang dingtang skulrango poraienggipa sak 500-na baten chatro chatrirang bak ra·angtokaha.
Ia program-ko West Garo Hills a·jani Deputy Commissioner Vibhor Aggarwal-ni dilanichi ong·ataha aro ia program-ko a·bachengatanio, Additional Deputy Commissioner (ADC) aro District Planning Officer Florina Boro, jinmana aganprakengon, an·tangtangni janggi tanganina dingtang dingtang cholrangko nichina aro an·tangtangni miksonganirango kim·kim ong·china chatro chatrirangko didiangaha.
Ia program-ko West Garo Hills a·jani District School Education Officer John Augustine Momin dilangengon, dingtang dingtang kam ka·e cha·ani cholrangko somoi gita u·iatna nangani gimin aro chatro chatrirangni gisepo, an·tangtangna cholrangko basee ra·na nangani gimin janapangaha.
Ia program-ko District School Education Office, District Planning Office aro District Administration nangrime ong·ataha aro ia program-o dam 30-mangni gita skulrangoni, mongsongbate class 9-oni class 12-ona poraienggipa chatro chatrirang bak ra·angaha.
