TURA: LPG cylinder aro uandake dingtang dingtang kamrangna Aadhar registration-ko nangtelgipa ong·enga ine adita salrangna skang, West Garo Hills aro East Khasi Hills a·jani Deputy Commissioner (Supply) u·iataniko on·ahani gimin South Garo Hills a·jani social activist Greneth M Sangma jegalataha.
Mandena nangchongmotgipa kamrango Aadhar-ko nangtelgipa ong·atengani gimin sorkariko jegalatengon, kacharirango aro Justice KS Puttaswamy (Retd) vs Union of India-ni case-o Aadhar Act-ko ja 12-ni gisepo sal 182 ba una bate India a·songo donggiparangkosa miksonga aro ian India a·songo songdongkamgiparangkode miksongja ine Supreme Court-ni rai on·gimin dongani gimin a·songo songdongkamgiparangnade nangchongmotgipa kamrangna Aadhar-ko ra·ani ong·ja ine Sangma parakataha.
Gnigipao, Greneth M Sangma vs State of Meghalaya-ni case-o Meghalaya High Court-ni rai on·aniko janapatskaengon, nangchongmotgipa kamrangna Aadhar dongjagenchimode, PAN card, Voter ID ba Passport-rangkoba ra·chakchina ge·etaniko on·manaha ine Sangma parakataha.
“Aadhar nombor dongjani gimin dingtang dingtang scheme-ni namgnirangko champengjachina gita kacharian raiko on·manahani gimin LPG-ko ra·na gita DAC number ba eKYC baksa link ka·gipa chu·gimik Aadhar-ko on·china draaniara, kacharini ge·etaniko manija ga·akenga,” ine Sangma parakataha.
Aadhar card dongjani gimin darang mandean LPG-ko man·gija ong·na nangja aro kacharini ge·etaniko sorkari ja·rikna nangchongmota ine Sangma didiataha.
