Baghmara: Social activist Greneth Sangma, uni kosako matnange ACHIK organisation-ni Shallang PS- West Khasi Hills (WKH)-o meja Apirl 9 tariko segatgipa FIR-ko kakket ong·ja ine talataniko on·aha.
“Uamangni angni kosako ong·gija matnange FIR-ko segataha unbaksana electronic aro print media-rango matnange angni bimingko ong·siataha. Maini gimin ACHIK, jeni headquater Tura-o donga, indiomangba Shallang PS-osan jean Tura-ni jurisdiction-o ga·akja unosa FIR segataha, iani giminba sing·doani ong·enga. Ian uamangni legal system-ko jakkalsretna jotton ka·ani ong·a, uamangni kattarang ba matnanganirang kakketgipa ong·chongmotode Tura Police Station-onasa re·anggenchim, jeon dolgni party-an donga” ine Greneth aganaha.
Organisation-ko bikotgipa gimik memborrangan association baksa bakrimjaha, saksamangmang da·o ong·enggipa president-san dongaijok iani bidingo sing·na angni daito ong·a. Organisation-ni founder aro vice president ong·aoni ong·kataha, maina organisation, ACHIk manderangko cha·bokenga gita nikaha ine Sangma matnangaha.
Indake Sangma, mejaomangmang Goalgoan ong·anggipa obostao jeon Dilseng Sangma siaha uko janapangaha. Dilseng Sangma-ni siani a·sel Garo Hills-o namen so·sojengjeng ong·angaha.
Chong·motde ACHIK memborrangni kuari nokgiparangoniko lak 15 tangka dabiani a·selsa golmal ong·aha, golmalni ja·pangde ua kattasa.
“Jean tangka dabiani gimin angna kobor on·aha, uni bimingko mingatjaenga maina uni janggina kenchakani ong·gen. Uandake ACHIK, niamgri kuari chalaiani bidingo jajrengmanchagipa ong·ode maini gimin uamang daitoko jako ra·gipa authorities-na u·iatjaha? Authorities-ba cha·bokgipasa ine u·iode maini gimin ia mamlako Union Ministry-ona sokatja? ine sing·doangaha.
Indiba iarangni palo ACHIk, kuari nokgiparangoniko tangka dabiaha. Iandakgipa obostarangara jatna ka·saaniko aro songsalna dangdike on·giparang ong·ama? ua a·sel ong·ani saloba ACHIK memborrang tangka ra·na gitasa re·angahachim, uamang jatna aro songsalna chanchie re·anggipa ong·ja.
“Organisation-ko iandakgipa kam ka·anichi jatni saksa janggitangko gimaatna nangaha.
Uandake a·sel ong·anio rim·a man·gipa sak 28 manderangni giminba Greneth, SP aro OC baksa agangrike mikkangchi rim·angjachina mol·molaha. Indiba angkosa uamang police-na srik kobor on·timgipa ine aganskaha.
“Dilseng Sangma-ko so·otani mamlaoba ACHIK, jrip dongaha, uandake Dipok Marak jean ACHIK-ni sakgipin membor ong·achim, uko so·otani mamlakoba galchipe donaha, ACHIK, jatna kam ka·gipa ong·ja ine Greneth matnangaha.
