SHILLONG: Batanggimin salrangni gisepo, Meghalaya Legislative Assembly-ni Estimates Committee, department ge·dok, chong·motan Education, PWD, PHE, Social Welfare, Home (Police) aro IT department-ni kamrangko nipilangaha ine Nongpoh-ni MLA aro committee-ni chairman Mayralborn Syiem parakataha.
Ia department-rangni kamrangko nipilani bidingo talataniko on·angengon, Education department-ni ning·o uamang, Rongjeng-o rikenggipa Model Degree College, Kiang Nangbah College-ko dal·dapatani, dingtang dingtang a·jarango polytechnic-rangko kuliani aro sorkari LP skulrangko nambate rikani kamrangko niangaha ine Syiem parakataha.
PWD-ni bidingo janapangskaengon, a·dok ning·o aro a·palo rikenggipa sorkari nokrang aro dingtang dingtang biaprango Meghalaya House-rangko taridapani aro nambate rikanirangko nipilangaha ine committee-ni chairman aganaha.
PHE department-ni kamrangko nipilani bidingo janapatskaengon, Greater Ampati Water Supply Scheme aro gipin project-rangko somoi gita matchotatna nangengani gimin chanchirimangaha ine Syiem parakataha.
Social Welfare department-ni kamrangko janapatskaengon, komibeoba dam 1600-mangni gita songrango Anganwadi centre-rang dongkujaengani gimin ia songrangoba Anganwadi centre-rangko rikna gita ta·raken kam ka·china department-ko ge·etangaha ine Estimates Committee-ni chairman parakataha.
Home (Police) department-ni bidingo janapatengon, Khasi aro Garo Hills jolrango rikenggipa nokrangni gimin committee chanchirimangaha aro kamrangko ta·rake ka·china ia committee, kam ka·enggipa dolrangko aro police headquarter-na ge·etaniko on·angaha ine Syiem aganaha.
IT department-ni kamrangko nipilani bidingo janapatskaengon, Umsawli-o rikenggipa IT Park-ko matchotahani gimin ian kamgri ong·e dongenggipa chadamberangna kamrangko tikate on·anio dakchakani ong·gen ine Syiem parakataha. A·dokni ki·tikbriona ta·rakgipa internet-ko on·na ka·enggipa kamrangkoba committee nipilangaha ineba Syiem aganaha.
