Umiam-o Taj Resort kulina manchianiko ra·chaka inako songni dilgiparang jegala

SHILLONG: Umiam Lake-ni Lumpongdeng Island-o Taj Resort aro Spa kulina manchianiko songni dilgiparangba namnikpaenga ine Ri Bhoi a·jani Deputy Commissioner (DC) office-oni parakatani ja·man, iandake parakataniko Umiam jolo donggipa Dorbar Shnong-rang jegalataha aro da·o dipet ia biapo Taj Resort aro Spa kuliani bidingo uamang Detailed Project Report (DPR)-rangkon name nipilkujani gimin maming ja·kurangko de·a dongkuja ine talataniko on·angaha.
Sukrobar salo, District Tourism Promotion Society, dingtang dingtang sorkari department-rang aro Umiam jolo donggipa song dambongani Dorbar Shnong baksa tom·e chanchirimangani ja·man, ia biapo Taj Resort aro Spa-ko kulianichi Lumpongdeng-o donggipa biaprangna maming nangchakeaniko ra·bajawa ine songni dilgiparangba ia project-ko ra·chakna tik ka·aha ine Ri Bhoi a·jani Deputy Commissioner Abhilash Bharanwal parakatahachim.
Indake ong·engon, Lumpongdeng Island-o Taj Resort aro Spa-ko kulina tik ka·aniko songni dilgiparangba namnike ra·chakaha ine parakataniko Mawlyndep-ni Rangbah Shnong Jinu Kharbuh, Umiam-ni Rangbah Shnong Steven Kharkrang, Umniuh-ni Rangbah Shnong William Lyngdoh aro Umbir-ni Rangbah Shnong PJ Kurbah jegalatskaenba, da·o dipet ia biapo Taj Resort aro spa kulina tik ka·aniko ra·chaka dongkuja ine talataniko on·angaha.
Ia jolrango namroro silroroanikode uamang jegalenga ong·ja indiba ia project-ara, samtangtango ong·telaigiparangna aro songni manderangna namgni ong·genma ma namgijaniko ra·bagenma, iako manderangna talate on·na man·na gita ia project-ni gimin uamang tale ma·sie ra·chengna nangchongmotenga ineba Dorbar Shnong-ni dilgiparang parakataha.
“Chinga songni dilgiparang ong·e, gipin department-rang baksa DC office-o tom·aniko ong·ataniona re·ange bak ra·epaaha indiba Orchid Lake Resort-o aro acre 36 ong·gipa Lumpongdeng jolo Tourism department-ni rikna miksongenggipa Taj Resort aro spa-ni bidingo nangchongmotgipa pilak lekkarangko name nichengani ja·mansa ia project-na chakpaaniko on·genma on·jawa, ukode chanchigen,” ine Umiam jolrango donggipa song dambongani Dorbar Shnong aganenba, ia project-ara ia songrangna nangchakeaniko ra·bagenma ra·bajawa, da·o dipet uamang DPR-rangko name poraie nina man·kujaenga ine parakataha.
Ia project-na chakpaaniko on·na gitaba uamang da·onan maming talate on·anirangko man·kujaenga ine janapatengon, Lumpongdeng Island-o Taj Resort aro spa kulina manchianiko jegaldilenggipa Green Tech Foundation (GTF)-oniba uamangna iani gimin maming u·iatanirang dongkuja aro iani bidingo uamang songbadrangoniko aro gipin media-rangonikosa knasona man·engkua ine song dambongani dilgiparang parakataha.