SHILLONG: Agia-Medhipara-Phulbari-Tura (AMPT) ramani adita bakrangko tariani ja·man baditaba salrangni gisepon nosto ong·pilahani gimin ia ramani bidingo inquiry dakchina opposition Trinamool Congress (TMC) dol dabiangaha.
Nosto ong·gipa ramako Rajabala-ni TMC MLA Mizanur Rahman Kazi nieaha aro ia ramako nieani ja·man kobor ra·timgiparangna u·iatengon, ia ramako taria matchotaoni sal 15-ni gisepon gital tarigipa ramani 70 percent-kode chi pe·angaha ine parakataha.
Gital tarigipa ramani ta·rake nosto ong·aniara kam namgijako mesokani ong·a ine janapatengon, ian manderangni tangka paisarangko indin bon·atani gita ong·aha ine iani bidingo ta·raken sandirokenba, contractor-ni kosako ja·kuo de·china Kazi dabiangaha.
Ia ramako taridapmangmangaigija, ramako chu·gimik gital taripiltaichina gitaba Rajabala MLA dabiangaha.
Ia ramani ta·rake nosto ong·pilaniara official-rangni a·selma, contractor-ni a·selma ma dolgnini a·selanma, iako ma·sie ra·na gita name sandirokchinaba TMC MLA dabiangaha.
Kazi-ni parakatani gitade, nosto ong·gipa ramara, Gumaijura-oni Rajabala-ona km 10 ong·gipa bakrang ong·a aro Gumaijura-oni Fulbari-ona dakanggipa bakrangba a·a ruronge nosto ong·aha.
Iani bidingo somoiko done sandirokatchina gita PWD Minister-ko didiatengon, gital tarigipa ramani ta·rake nosto ong·pilaniara kam ka·giparangni aro official-rangni simsakgijaniko mesokani ong·a aro mikkangchi iandakgipa a·selrang ong·taijana gita ja·kurangko de·na nanga ine Rajabala-ni TMC MLA parakataha.
