GHADC-na dingtang electoral roll, GCL aro Service Rule-ko ra·gatna kam ka·enga: CEM
TURA: Mongolbar salo, Garo Hills Autonomous District Council (GHADC)-ko man·chengaoni bilsi 74 gapaniko Tura-ni District Auditorium-o maniangaha.
GHADC-ni bilsi 74 gapaniko manianio, a·dokni Tourism Minister Timothy D Shira, mongsonggipa sokgipa ong·e bak ra·angaha aro unbaksana West Garo Hills a·jani Deputy Commissioner Vibhor Aggarwal, GHADC-ni Chief Executive Member (CEM) Dhormonath Ch Sangma, Deputy CEM Stevie M Marak, GHADC-ni Chairman Sengchim N Sangma, ABDK-ni General Secretary, Rev. Dilseng Sangma, MDC-rang aro GHADC-ni official-rangba bak ra·angtokaha.
Ia tom·anio, a·dokni Tourism Minister Timothy D Shira, jinmana aganprakangengon, British-rangni India a·songko sason ka·aoni jakgitelanina India a·songni manderang ru·uta bilsina dakgrikbae 1947 bilsio jakgitelaniko man·aha aro India a·songni jakgitelaniko man·ani ja·manba a·brirango songdonggipa Tribal jatrang, dal·dalgipa jatrangni ning·o janggi tangna nangengani giminsa Autonomous District Council (ADC)-ko on·china dabiskaaha ine parakataha.
Ia dabianiko knachake, an·tangtangan an·tangtangni a·ko chiko, a·king goreko, jatni dakbewal rikbewal pilakon niamrangko tarie ripingchina ine 1952 bilsio Garo Hills Autonomous District Council (GHADC)-ko on·aha ineba Shira parakataha.
Ia tom·anio GHADC-ni CEM Dhormonath Ch Sangma-ba jinmana aganprakengon, 1952 bilsio Indian Constitution-o pangchake Garo Hills Autonomous District Council (GHADC)-ko man·aha, unoni Captain Williamson Sangma GHADC-ni skanggipa CEM ong·e chalaibae ru·uta bilsina A·chik jatni nangnike donggipa niamrangko aro kajinarangko gile jatni namgnina ua dangdike on·angaha ine aganaha.
Manderangni nangnikanirangko chu·sokatna man·engaha ine janapangskaengon, ru·uta bilsirangna A·chik jatni nangnike dongenggipa niam jekon GHADC-o non-tribal bak ra·na man·gijani niamko chu·sokatna man·aha aro Council-o kam ka·enggiparangni ja 43-mangna dormaha man·gija dongenganiko a·dokni skotong minister Conrad K Sangma-ni dakchakanichi namatna man·aha ine Sangma aganaha.
Garo Hills-o songdongenggipa manderangni nangnikenggipa GHADC-na dingtang electoral roll, Garo Customary Law (GCL) aro Service Rule-ko ra·gate on·na gitaba ia gital Executive Committee (EC) kamko ka·enga ine janapatengon, ia kamrangko chu·sokatna tikkelanio pilakkon bakrimchina gita GHADC-ni CEM didiangaha.
GHADC-ni bilsi 74 gapaniko manianio, dingtang dingtang skulrang aro dolrang, jekai St Xavier’s Secondary School, Tura Public School, Montfort School, Tura Music Academy, Do·kaku Art & Cultural Association aro Da Suraka dolba, gitrangko ring·e, chrok mesae aro dakmesoke mesokangaha.
