Spa-rangko kulianichi a·doko noti dari dakaniko bariatnaba gnang: VPP

SHILLONG: Meghalaya a·doko Taj Umiam Resort aro Spa project-ko kulina a·dok sorkari miksongengani gimin a·doko spa-rangko kulianiara Shillong-ko ‘sex city’ pil·atani cholrang donga aro Meghalaya a·doko noti dari dakaniko bariatnaba gnang ine Voice of the People’s Party (VPP) mikrakataniko on·angaha.
Iani bidingo kobor ra·timgipa manderang baksa agangrikengon, a·doko spa aro dal·dalgipa hotel-rangko kulina miksongengani gimin VPP-ni president Ardent Miller Basaiawmoit, a·dok sorkariko sing·doatenba, iandakgipa project-rangde a·dokni Tribal-rangna maming namgnirangko ra·bana man·janaba gnang aro batesa ong·gija kamrangko bariatani cholrang donga ine mikrakataniko on·angaha.
“An·ching Tribal manderangara, spa-rango mai kamrangko ka·a, ukoba name ma·sipaama? Spa-rangko kulianichi Tribal-rangni namgipa daka rikanirangsa gimanaba gnang,” ine Basaiawmoit aganaha.
Spa-rango a·dokni chadamberangko, mongsongbate me·chikrangko kam ka·na rakkianichi ian ong·gija kamrangko ka·na dilsretako man·anggen ineba VPP president, mikrakataniko on·angaha.
Meghalaya a·dokara samtangtango ong·telaigiparangchi pattiako man·gipa a·doksa ong·ani gimin iandakgipa dal·dalgipa project-rangko nangja indiba samtangtango ong·telaigiparangko ripinganichi tourism-ko tang·doatanikosa nangenga ineba ua aganaha.
“Gipin biaprangoni re·baenggipa manderang, iandakgipa dal·dalgipa hotel-rango dongani pal an·ching Tribal-rangni daka rikanirangkosa cha·tote nichina aro an·ching jatrang baksasa dongchina,” ine Basaiawmoit aganenba, gipin biaprangoni re·baenggipa manderang homestay-rango dongnasa namnikbata aro samtangtango ong·telaigiparangkosa nina re·batokenga ine parakataha.
Meghalaya a·doko dal·dalgipa project-rang, jekai gital Secretariat, PA Sangma Stadium aro Assembly nok gita dakgipa project-rangko rikanio gipin biapni manderangsa namgnirangkode man·bataiaha ineba VPP president matnangataha.
Umiam-ni Lumpongdeng Island-o Taj Resort aro Spa-ko kulina sorkarini manchianiko Green Tech Foundation-ni jegale, okumu chakengani giminba ua an·tangni chakpaaniko parakataha.