TURA: West Garo Hills a·jani Dalu C&RD Block ning·o gital rikgipa Dalu Block Integrated Development Complex-ko Sukrobar salo, a·dokni Chief Minister Conrad K Sangma, nokdonggae on·angaha aro ia nokko nokdonggae on·anio, a·dokni Cabinet Minister aro Dalu MLA Brening A Sangma-ba dongpae bak ra·angaha.
Ia gital nokko nokdonggae on·anganio a·dokni Chief Minister, tom·bimonganio bak ra·enggipa manderangna aganprakangengon, Dalu Block-ko 1954 bilsio, Community Development Program-ni ning·o kuliaha aro ia block-ko kulichengaonin, a·dokni namroro silroroanina re·mikkanganio mongsonggipa bak gita ong·a ine parakataha.
Ru·uta bilsirangoni Dalu jolo songdongenggipa manderangni dabienga gita Dalu-ko 2022 bilsio sub-division songe on·na man·aha ineba Chief Minister aganaha.
Songadam nokadamrangko chalaiani bidingo janapangengon, block office-rangan manderangna sorkarini kamko dangdike on·anio skanggipa bak gita ong·a indiba bang·bata block-rangkon nosto ong·gimin aro nok para ra·giparangonisa office-rangko chalaiengachim ine Sangma aganaha.
“Indita bilsirangna an·chingni block office-rang neng·nikanirangko man·e chalaina nangaha indiba an·chingni officer-rang aro kam ka·giparang, an·tangtangko on·kange kam ka·aha, iani gimin anga uamang pilakkon mittelna ska,” ine Chief Minister aganaha.
Sorkarini kam ka·ani bewalko janapangengon, “An·ching nokdang ge·antionan namroro silroroaniko sokatna nangnikenga ong·ode an·ching skanggipa pangchakanion kamrangko mangrakbatatchengna nanggen. Block-ni gadangrangko mangrakbatatanian ia kamko chu·sokatani chabi ong·a,” ine ua aganaha.
Meghalaya a·dokko man·chengani somoio dam 24 block-rang dongaoni da·o dam 56 C&RD Block-rang dongaha ineba Chief Minister aganaha.
Ia gital rikgipa Integrated Development Complex-ni bidingo janapangengon, iade nokmangmangsan ong·aia aro ia nokko manderangna namgni ong·atnagipade officer-rang aro kam ka·giparangni jakosa ong·a ine Chief Minister parakataha.
Ia gital nokko rikanichi Dalu Block-ni ning·o donggipa te 12,000-na batgipa nokdangrang aro sak 30,000-na baten manderangna, dingtang dingtang department-ni kamrangko ra·bae on·anichi namgnirangko on·na man·gnok ineba Chief Minister aganaha.
Kamrangko ka·engon, manderangna, mongsongbate chel·a biaprangoni aro songadam nokadamrangoni dingtang dingtang kamrangna re·baenggipa manderangna ka·sae dangdike on·china gitaba Chief Minister, Dalu Block-o kam ka·enggipa manderangko didiangaha.
Ia tom·anio a·dokni Cabinet Minister aro Dalu-ni MLA Brening A Sangma-ba jinmana aganprakengon, ia gital office nokko on·ahani gimin a·dokni Chief Minister-ko mittelpilangenba, sorkarini on·enggipa dingtang dingtang scheme aro namgnirangko ra·china jolo songdongenggipa manderangko didiangaha.
