Tura: West Garo Hills Auto Rikshaw Association-ni batanggimin February jani 7 tariko New Tura playground-o ong·atanggipa Lucky Draw-ni gimin suk ong·gijanirangko manderang paraktokaha. Lucky draw-ko ong·atgiparang kra gita boksisrangko sualja ine matnangaha.
Koborni gita, bang·a manderangan jemangan lottery ticket-rangko breahachim aro ticket-ko bree jemangkon chegiparang ineba parakatahachim uamang da·onaba prize ba boksisrangko man·kujaenga, uni gimin lucky draw-o bak ra·giparang suk ong·gijanirangko paraktokaha.
Suk ong·gijagiparangoni saoba ia mamlako Superintendent of Police (SP) Tura-na lekka sedoe badi ka·angaha. Lottery ticket-ko chegiparang changni chang uamangni man·a nanggipa boksisrangko ra·na jotton ka·ahachim, indiba organiser -rang on·na nanggnirangko on·anio chu·sokjaenga. Uamang sing·anirangnaba kragitan aganchakaniko on·jaenga.
Prize-ko man·kugijagiparangara- 5th prize- jeon bolsa Maruti Celerio gariko on·na ku·chakahachim, una agre 2nd book prize-o Scooty Ntorq-ko on·na ku·chakaha, uarangko da·onaba on·kujaenga. Ticket-ko chegiparang, ticket-rangko changni chang mesokaonan uamangni man·a nanggni boksisrangko man·kuja.
Iana jinma manderang suk ong·gijanirangk parakaha, uamangko cha·bokahakon ineba chanchipenga, iandakgipa cha·bokanirangara A·chikrangni mikkim rasongko ong·siata ineba aganaha.
Uni gimin ta·raken lottery chegiparangna uamangni boksisrangko on·china gita dabiaha. Organiser-rang uamangni ku·chakgipa prize-rangko on·ja ong·ode uamangni kosako rakgipa ja·kurangko de·anggen aro High Court-ona re·anggen ine aganaha.
Iarangni gisepon authorities, ia mamlako am·sandina ka·dongataha.
