2027 National Games-ni closing ceremony-ko Tura-o ong·atnaba gnang
TURA: Tura-ni Dakopgre gittimo Multi Facility Centre (MFC)-ko rikna gita Sonibar salo, a·dokni Chief Minister Conrad K Sangma, pangchakaniko songe on·angaha aro ia tom·anio, gittimni dilgiparang, jolo songdongenggipa manderang aro dingtang dingtang official-rangba bak ra·angtokaha.
Ia MFC-ko rikna gita dingtangmancha Dakopgre Baptist Mondolini Rev Brinidita R Marak, Isolo bi·chakangaha.
Dakopgre-o MFC-ko rikna pangchakaniko songe on·anganio a·dokni Chief Minister, tom·anio bak ra·giparangna aganprakangengon, ian Dakopgre jolo songdongenggipa manderangni ru·uta bilsirangna nangnikani ong·a ine janapangenba, da·alo ia MFC-na ua Chief Minister ong·esan ong·aigija saksa joltangni MLA ong·e pangchakaniko songe on·na kusi ong·bea ine parakangaha.
“Batanggimin bilsichetna anga, angni ka·rimskarang aro officer-rang baksa, a·doko dingtanganiko ra·bana ku·cholsan ong·e kamko ka·aha aro da·alo Tura songjinmao bang·en namroro silroroaniko nikna man·e anga katchabea,” ine Sangma aganaha.
Dakopgre-ni wilwilao rikenggipa project-rang, jekai PA Sangma Integrated Sports Complex, Additional Secretariat, five-star hotel aro uandakgipa project-rang, ia jolrangko tang·doatna sienga ineba Chief Minister aganaha.
Araimile bibraoni Ballonggre-ona PA Sangma Road-ko nitobatate tarina sienggipa project-ni gimin janapangengon, ia ramarango street light-rangko, CCTV camera-rangko aro manderangna dingtang dingtang cholrangko tarina sienga ine Chief Minister parakataha.
Baljek Airport-ko taridapna miksongenggipani gimin janapangskaengon, ia airport-ko taridapani baksana dingtang dingtang project-rangko matchotahaode ian Dakopgre aro Tura songjinma gimikon dal·begipa dingtanganiko nikna man·gnok ine Chief Minister aganaha.
Iandakgipa namroro silroroaniara, Tura songjinmako dal·batatasan ong·aijawa indiba tourism-ko tang·doatani ong·e, manderangna janggi tangani cholrangkoba on·na dakchakgen ine Sangma aganaha.
Dingtang dingtang kamrango chu·sokgipa ong·na man·engani gimin ua Dakopgre Development Committee-koba mittelpilangaha.
Dakopgre-o rikna sienggipa MFC-na Chief Minister’s Special Development Fund (CMSDF) aro Meghalaya Basin Development Authority (MBDA)-oniko gong lak 52 tangkarangko chamataha ineba Chief Minister parakataha.
Ia MFC-o skill development program-rangko ong·atna, youth club-rangni namgnina, indoor games-rangna, music-na, coaching aro study centre-na aro dingtang dingtang kamrangna jakkalangchina gitaba Chief Minister ku·pattiangaha.
Re·baenggipa 2027 bilsio Meghalaya a·doko sokachakna sienggipa National Games-ni bidingo janapangengon, ia National Games-ni mingdok kal·susaanirangko Tura-o ong·atgen aro closing ceremony-koba Tura-on ong·atna miksongenga ine Chief Minister parakataha.
National Games-ko sokachakaniara Meghalaya a·dokni itihaso dal·batsranggipa program-ko ong·atani ong·enga ine janapatengon, ia National Games-ko name chu·sokgipa ong·atna pilakkon sorkari baksa bakrime kam ka·china Chief Minister didiangaha.
