Umiam project-ni bidingo ‘politics’ kal·na jotton ka·enga ine VPP-ko Cong matnanga

SHILLONG: Umiam Lake-ni Lumpongdeng Island-o Taj Resort aro Spa kulianiko jegale, April-ni 22 tariko Voice of the People’s Party (VPP), Motphran-o jinma tom·bimonganiko ong·atna tik ka·engon, ian manderangko salna VPP-ni ‘politics’ kal·anisa ong·enga ine a·dokni Congress dol matnangatskaaha.
A·doko dingtang dingtang dolrangni jegalaniara, sorkarini five-star hotel kulianikode ong·jaengachim indiba Lumpongdeng Island gita dakgipa biapo five-star hotel kulianikosa jegalengachim indiba mitam dolrang, iako ma·sisretenga ine Congress dolni dilgipa Manuel Badwar parakataha.
Ia project-ni bidingo Congress dolni chanchianiko janapatengon, a·doko resort ba spa-rangko kulianikode uamang jegaljaenga ine Badwar talataniko on·angaha.
“Spa-rangko kulianide a·dokna namgni ong·gen maina bang·a manderangan iandakgipa kamrango janggi tangna gita pangchaktoka. Spa gita dakgipa kamrangko an·ching ong·gija dakgipa biap ine aganna man·ja,” ine Congress dolni dilgipa aganaha.
Meghalaya a·doko spa-rangko kulianiara, noti dari dakaniko bariatani cholrang donga ine adita salrangna skangsan VPP-ni president Ardent Miller Basaiawmoit, mikrakataniko on·angahachim.
Indake ong·genchimoba, ia project-ko kulianio Orchid Lake Resort-na batangja ong·ode spa-koba uamang ra·chakna kusi ong·aigen ine Badwar parakatskaaha.
Ia project-ni bidingo sorkari baksa name talgrikchenggija da·o mitam manderang, ‘bang·gija vote’-rangnan iako politics-ona ra·angskaengaha ineba ua, VPP-ko miksonge matnangataha.
Iani bidingo name agangrikchenggija, so·sojengjeng ong·atna jotton ka·enga ineba ua VPP-ko matnangataha.
Badwar-ni parakatani gitade, ia project-ko jegalanio mongsonggipa miksonganikon da·o manderang, dingtangatengaha aro sorkariba iani bidingo name talatanirangko on·jaha.
Indake ong·engon, ia project-na sorkario chu·onga gitan biaprang donggenchimoba ia project-ko Lumpongdeng Island-onaba ra·angengani gimin ua, a·dok sorkariko sing·doatskaaha.
Lumpongdeng Island-ara a·dokni manderangna namen gamchatbegipa aro samtangtango ong·telaigipa biap ong·ani gimin iandakgipa biaprango five-star hotel-rangko kulianide namen namgijako ra·bagen ineba Badwar talataniko on·angaha.