Montfort Teacher Training College for Special Education-ni bilsi 25 gapaniko mania

TURA: Mongolbar salo, Montfort Teacher Training College for Special Education-ni Silver Jubilee ba bilsi 25 gapaniko, Tura-ni Danakgre-o donggipa Montfort Centre for Education-o maniangaha aro ia manianio, a·dokni Chief Minister Conrad K Sangma, Tura-ni Bishop Andrew R Marak, Rev Bro Dr Maria Soosai, Rev Bro Dr VK George, Montfort Centre-ni skigiparang, chatro chatrirang aro Catholic Mondolini dilgiparangba bak ra·angtokaha.
Ia salko maniani bak gita program-ko ong·atanio, Montfort Centre for Education-o poraienggipa chatro chatrirangni dakmesokanirangko, git ring·anirangko aro chrok mesaanirangkoba nikangna man·aha.
Ia tom·bimonganio a·dokni Chief Minister, mongsonggipa sokgipa ong·e jinmana aganprakangengon, ia institute-ni bidingo janapangenba, “Bilsi 25-na skang ia Montfort Teacher Training College for Special Education-ko PA Sangma sagi nokdonggae on·ahani gimin da·alo anga ia manianiona re·bae bakko ra·epana nangnikaha,” ine aganaha.
Ia institute-ko kulichengani somoio salgro salaram jol gimikon special education-ko on·gipa training institute-rang damsaba dongkujachim aro ia Montfort Teacher Training College-an skanggipa institute ong·aha ineba Chief Minister aganaha.
“Bilsi 25-na skang, ia institute-ko kulianiara namen rakbegipa kam ong·enggen, maina iandakgipa institute-ko darangba kulia dongkujachim. Indiba na·simangan iandakgipa institute-ko kulichenggipaba ong·ani gimin namen kusiba ong·enggen,” ine Chief Minister aganenba, da·alo iandakgipa institute-rang bang·en dongaha indiba Montfort-an gitchambatsranggipa aro nambatsranggipa institute-rangoni damsa ong·kuenga ine parakataha.
Special education ba be·enni gita cholgri ong·gipa manderangna bida budi on·aniko bang·a manderangan bal boja gitasa ra·genchimoba Montfort gita dakgipa institute-de iako dangdike on·anichi dingtanganiko ra·baani chol gitasa ra·skaaha ine Chief Minister, mittele aganaha.
Sorkarini Meghalaya Outcome Transformation in Health, Education, Rural Development & Social Welfare ba MOTHERS program-ni bidingo janapangengon, ian songadam nokadamrango dingtanganiko ra·bana gita ma·giparangni daitoko jangchio done, dingtang dingtang department-rangni kamrangko chaprimgipa program ong·a ine Chief Minister, talataniko on·angaha.
Songni nokni manderangna dangdike on·anio dingtang dingtang Mondolirangni kamrangkoba Chief Minister mittelpilangaha.
Ia program-ko ong·atanio Rev Bro Dr Maria Soosai aro Rev Bro Dr VK George-ba jinmana aganprakangaha.