Assam-o gital sorkariko rikani ja·man simani bidingo agangrikaniko a·bachengtaigen

SHILLONG: Assam a·doko gital sorkariko rikani ja·mansa, Assam aro Meghalaya a·dok damgnini simarango ong·enggipa golmalrangko namatna gita agangrikaniko a·bachengpiltaigen ine sorkari parakataha.
Iani bidingo kobor ra·timgiparangna talataniko on·angengon, adita salrangna skangsan Assam Assembly election-ko ong·atahani gimin da·o dipet gital sorkariko rikna man·kujaenga aro gital sorkariko rikani ja·mansa, a·dok damgnini simarango ong·enggipa golmalrangko namatna gita agangrikaniko a·bachengpiltaina man·gen ine a·dokni Deputy Chief Minister aro West Jaintia Hills Regional Committee-ni chairman Sniawbhalang Dhar parakataha.
“Assam sorkari baksa agangrikaniara dontonggijagipa kamsa ong·ani gimin Assam-o gital sorkari songaniko sengna nangkuenga. Assam-o gital sorkariko rikahaon chinga dolgnini agangrikaniko a·bachengpiltaigen,” ine Dhar, kobor ra·timgiparangna aganaha.
Assam a·doko gital sorkariko rikkujani gimin regional committee-rangkoba songpiltaina nangkugen aro uni ja·mansa simani bidingo chanchirimaniko a·bachengna man·gen ineba Dhar parakataha.
“Assam-o sorkariko rikkujani gimin uamangchipakni sawa regional committee-ni chairman ong·gen, darangba ma·sikujaenga. Uamang sorkariko rikahaosa regional committee-rangkoba songna man·gen. A·dok damgnini gisepo tom·e chanchirimaniko a·bachengtaina skanga uamang chingna u·iatgen,” ine Deputy Chief Minister aro West Jaintia Hills Regional Committee-ni chairman parakataha.
A·dok damgnini gisepo meligrikgijanirangko 2028 bilsini Meghalaya Assembly election-na skangde namatna man·genma ine sing·anina aganchakaniko on·angengon, ia kamna da·o dipet somoirangko tik ka·a dongkuja ine Dhar aganaha.
“Ia kamo a·dok damgnian bak ong·ani gimin chinga ia kamko ta·raken matchotatna jotton ka·enga indiba ian altua ong·ja,” ine ua aganaha.
“Ia kamko matchotna gita bilsignima jagnima badita somoiko nanggen, da·o dipet anga aganna man·kujawa. Indiba ia kamko chinga man·a dipet ta·raken matchotatna jotton ka·enga,” ine Dhar aganaha.