Bijoliko kimitna nangani somoirango pangnan u·iataniko on·chengronga ine a·kanga
SHILLONG: Maiba kamrangna bijoliko kimitna nangani somoirango pangnan sorkari, u·iatanirangko on·chengronga ine Mongolbar salo, a·dokni Power Minister Metbah Lyngdoh a·kangatenba, da·ororo bijolini sianiara, mikka balwarang ta·rakani a·selsa ong·enga ineba talataniko on·angaha.
Power Minister-ni parakatani gitade, a·dokni badiaba biaprango maiba kamrangna bijoliko kimitna nangani somoirango, pangnan manderangna u·iatanirangko on·chengronga indiba mikka balwarang ta·rakani somoirangode, rang·gitikba bijolirang sina man·aia.
Iandakgipa obostarangode darangba mamingkoba dakna man·ja aro manderangni ma·sichakaniko nanga ineba ua aganaha.
Garo Hills-ni a·kawe jolrango konta 7-8-mangna bijoliko kimitronga ine matnanganirangna aganchakaniko on·angengon, ian ua jolrango kamrangko ka·engani giminsa ong·engnaba gnang maina a·dokni dingtang dingtang songrango aro biaprango bijolini scheme-rangko a·bachengatengani gimin bijoliko kimitna nangao ga·akenga ine Power Minister talataniko on·angaha.
Iandakgipa kamrangko name chu·sokatna man·na gita Power corporation, jolni dilgiparang aro dingtang dingtang dolrang baksa agangrikenga ineba ua aganaha.
Garo Hills-o, mongsongbate a·kawe jolrango, salon kontasnioni konta 10-mang ong·pile bijoli sirongengani gimin bijoliko on·ani namjabatenga ine adita salrangna skang, Rajabala-ni MLA Mizanur Rahman Kazi matnangatani ja·man a·dokni Power Minister, agan-talatanirangko on·angaha.
Garo Hills-ni a·kawe jolrango kontasnioni konta 10-mang ong·pile salantian bijoli sirongengani gimin ian load shedding ka·engama ba indin bijoli sitelengasama manderang ma·sipiljaenga ine Kazi matnangahachim.
Garo Hills-ni a·kawe jolrango bijoliko on·ani namjabatenga ine janapatengon, adita mikka balwa rakna a·bachengoba bijoli sirongaia aro basakobarangde rang·san bijolini voltage bate sokengani a·sel manderangni noko jakkalenggipa bang·a bosturangan nosto ka·ako man·enga ine Rajabala MLA parakataha.
Smart meter-rangko chatani bidingo janapatskaengon, a·dokni dingtang dingtang biaprango smart meter-rangko chatengaha aro May jani skanggipa antio kamrangko nipilangani ja·mansa kamrangko nambate ma·sina man·gen ine Power Minister parakataha.
