WILLIAMNAGAR: South Garo Hills a·jao, miksonga gnang chadrape so·otna jotton ka·anina saksa Garo Student Union-ni dilgipani kosako mokor doma (FIR) ka·doaha.
Ia ong·a obostani bidingo Nongalbibra Police outpost-ni ning·o ga·akgipa Jadi-ni Francis S. Marak, Rongsa Awe jolni Raindon M. Sangma-ni kosako matnange Jadi Police Outpost-o FIR-ko segataha.
FIR-o janapgimin gita, April 23 tarikni wal 9:40 bajio Dangsa Awe jolo Francis Marak-ni gariko rama jangchio dongdipatenba, rang·gitik uko chadrapaha aro ka·saninggija dake doka sataha. Marak-ni aganani gita, chadrapgipa mande dakgrikarango jako gangipako gana gnang aro gipin silchi darerangchi doke sate uko bilongbee saknaataha.
Una agreba, silchidarerang baksa chadrapani bewalrang aro bilongbee saknaataniara uni janggiko bon·atna miksonge dakani ong·a ineba Marak FIR-o janapaha.
Marak-ni parakani gitade, uko chadrapgipa mande Nongalbibra Regional Unit (Southern Zone)-ni Garo Student’s Union (GSU)-ni Vice President ong·e dilenggipa ong·a, ua gittim-ni badingchiwalenggiparangoniko, koila badinggiparangoniko aro Nongalbibra aro Jadi jolrango dokkan dake cha·enggiparangoniko tangka paisarangko ra·seke ra·enganio jak dongpagipaba ong·a ine matnange, dos dakgipa mandeni kosako iani am·sandianiko dakchina Marak, daito-ko jako ra·e kam ka·enggiparangko didiangaha.
Indake Marak, dos dakgipa mandeni kosako, Bharatiya Nyaya Sanhita (BNS)-ni ning·o, uko so·otna jotton ka·anina, ka·saninggija dake doka satanina, mamlako segataha aro mikkangchi uni naljokanina police-rang iani bidingo ta·rake ja·ku de·china mol·molangaha.
