TURA: Batanggimin March jao so·sojengjeng ong·angani ja·man, Garo Hills-ni bang·bata biaprangon gipin biaprangoni kam ka·e cha·giparangko aro bading chiwalgiparangko nokchaktokjaenganina Assam a·dokni Mankachar jolrango, Garo Hills-ni bading chiwalgiparangkoba champengsoskana gita All Assam Minority Students Union (AAMSU) ka·mikkenataniko on·angahani gimin ia dolna Garo Hills-ni A·chik State People’s Front (ASPF), mikrakataniko on·angskaaha.
“Indian Constitution-ni Article 19(1)(g)-ni ning·o je kamkoba ba bading chiwalanirangkoba ka·na gita bilrangko on·manahani gimin iandake Garo Hills-ni bading chiwalgiparangko champengna jotton ka·aniara, a·songni niam bidikkon pe·ani ong·enga. Niam gri bading chiwale cha·aniko champengani, bading chiwalgiparangko ka·mikkenatani ba bostu salbaanirangko champengna jotton ka·aniara niamni a·palo ong·a aro dongimin niamrango pangchake sastirangko man·ani ong·a,” ine ASPF-ni general secretary aro ukil Bernitha Marak parakataha.
Garo Hills-ara Indian Constitution-ni Sixth Schedule-o ga·akgipa biapsa ong·ani gimin Tribal-rangni jakgitele sason ka·ani aro dingtang dingtang kamrango bilko man·gipa ong·a ine janapatskaengon, a·songni niam bidiko Tribal-rangna on·gimin bilko champengna jotton ka·aniara kragijani ong·a ine Marak parakataha.
Bostu salbaaniko aro bading chiwalanirangko champengjachina aro bading chiwalgiparangko ka·mikkenatjachina gita AAMSU-ko didiatengon, ia mol·molaniko manigija champengna jotton ka·genchimode ba bading chiwalgiparangko ka·mikkenatna jotton ka·genchimode kacharirango badi ka·doana agre maming chol dongjawa ine ASPF mikrakataniko on·angaha.
GH-ni badinggiparangko champengna jotton ka·ani gimin AAMSU-ko ASPF mikrakata
Date:
Share post:
