TURA: Garo Hills Autonomous District Council (GHADC)-na Separate Electoral Roll (SER) ba dingtang Electoral Roll-ko tarina gita kamrangko ka·na songe on·gipa committee-ni report-ko bakan GHADC-ni dilgiparangna on·na siengaha.
GHADC-na dingtang electoral roll-ko tarina kamrangko ka·na gita dingtangmancha committee-ko re·anggipa 2025 bilsini May jao songe on·aha aro ia committee-na gitcham IAS Officer Huberth B Marak-ko chairman-na songenba, Horticulture Department-ni gitcham Deputy Director Dr Merril N Sangma, GHADC-ni Legal Advisor Augustine R Marak aro Agriculture Extension Officer Rohan Ch Momin-ko Membor dake songe on·angahachim.
Indake ong·engon, GHADC-na dingtang electoral roll-ko tarina pangchakanirangko sandianio kamrang matchotangengaha aro bakan report-ko GHADC-ni dilgiparangna on·gnok ine committee-ni membor Dr Merril N Sangma parakataha.
“GHADC-na dingtang electoral roll-ko tarina je pangchakanirangkon am·sandie man·aha, uni report-ko ru·utgija salrangni gisepon GHADC-ni dilgiparangna submit ka·gnok aro report-ko GHADC-na submit ka·ahaon, GHADC-ni dilgiparang, report-ko nipiltaienba, Special Session-ko ong·ate pass ka·gen aro uni ja·mansa Meghalaya Governor-ni ra·chakaniona watatgen. Governor-ni ra·chakako man·ahaon, GHADC-na dingtang electoral roll-ko tarina man·gnok,” ine Dr Sangma, kobor ra·timgiparangna parakataha.
GHADC-na dingtang electoral roll-ko tarina kamrangko ka·anio dingtang dingtang neng·nikanirangko chagrongna nangahani a·sel report-ko on·anio ja·manchakatako man·na nangaha ineba Dr Sangma talataniko on·angaha.
“Jensalo ia kamna appoint ka·ako man·aha, ua somoionin chinga SER-ni bidingo ta·raken kamna re·chakatgenchimoba, NGEA-ni dormaharangna jingjengatanichi office-rangko on·na man·ningjaha aro committee-ni gita nangenggipa office-ni lekka ki·tapna korosrangkoba somoi gita on·na man·ningjaha. Iandakgipa dingtang dingtang neng·nikaniko chinga chagrongna nangaha indiba chakchike kamrangko ka·e da·o ia committee, kamrangko matchotna siengaha,” ine committee-ni membor parakataha.
GHADC-na dingtang electoral roll-ko tariani report-ko bakan on·gnok
Date:
Share post:
