SHILLONG: Doctor-ni kamna poraienggipa chatro chatrirangko, a·doktangona re·bapile, songadam nokadamrango dangdike on·china didina gita a·dok sorkari, medical bond policy-ko taridapna miksongenga.
Iani bidingo kobor ra·timgipa manderang baksa agangrikengon, a·doko, mongsongbate songadam nokadamrango specialist doctor-rang chu·ongjaengani gimin gipin biaprangona re·ange poraienggipa chatro chatrirangko, a·doktangona re·bapile dangdike on·china gita bond policy-ko taridapna miksongenga ine a·dokni Health Minister Wailadmiki Shylla parakataha.
“Sorkarini dakchakanichi gipin a·dokrango MBBS-ko poraienggipa chatro chatrirang, kam ka·na gita a·dokona re·bapilrongjaengani a·sel specialist doctor-rang chu·ongjaengani gimin medical bond policy-ko taridapna nangenga,” ine ua aganaha.
A·dokni Chief Minister baksa iani bidingo uni chanchirimgipani bidingo talataniko on·angengon, a·dokni MBBS chatro chatrirang, a·doktangona re·bapile dangdike on·china gita bond policy-ko dingtangatna miksongenga ine Health Minister parakataha.
Ia bilsi dipet Shillong Medical College-o skanggipa MBBS batch-ko a·bachengatna man·ahani gimin an·tangni kusi ong·aniko parakatskaengon, ia college-ko a·bachengatanichi a·doktangon chatro chatrirang medical-ko poraina man·engaha ine Shylla aganaha.
Cholrangko baridapatna gita a·dok sorkari, nursing school-rangko college-ona ra·doatengaha ineba Health Minister parakataha.
“Chatro chatrirang, cholrangko bang·bate man·china gita chinga nursing school-rangoni bang·batakon nursing college dake kuliskana jotton ka·enga,” ine ua aganaha.
Songadam nokadamrango specialist doctor-rang chu·ongjaengani gimin Health department, doctor-rangko short term course-rangna watatenga ineba Shylla parakataha.
A·dokni budget-o Health department-na 8 percent-ko chamahani gimin ian a·song gimiko bang·batgipa ong·aha ine janapatengon, dingtang dingtang cholrangchi a·dok sorkari, an·seng baljokani kamrangko namdapatna rake kamko ka·enga ine Shylla aganaha.
A·doko mande sakprakni an·seng baljokanina sorkarini koros ka·ani a·songni average-nan batenga ineba Health Minister parakataha.
“India a·songo mande sakprakna koros ka·ani bilsi gimiko gong 3500 ong·enga indiba Meghalaya a·dokode chinga mande sakpraknan gong 7000/- batpile koros ka·enga,” ine ua aganaha.
