TURA: ICAR ATARI Zone-VII Umiam-ni ning·o, South Garo Hills a·jani CAU-KVK, gama ge·anirango fertilizer-rangko jakkalani, ong·telaigipa a·salrangchi gama ge·ani, aro a·salrangko porikka ra·e a·salrangko name rakkina man·na gita re·anggipa April 20 tarikoni a·bachenge, dingtang dingtang songrango Intensive Awareness Campaign-ko ong·atenga.
Ia awareness campaign-ko da·o dipet South Garo Hills a·jani , Ringkapgre, Bibragre, Nodonggre, Kakhija, Daringgre, Suga, Simkalanggre, Rongrak, Kilboma aro Raja Ronggat songrango ong·ataha aro ia program-rangko ong·atanio sak 206 game ge·e cha·giparang bak ra·e namgnirangko man·aha ine SGH KVK-ni official-rang u·iataha.
A·salrangko porikka ra·e nina nangani aro gama ge·anio, kraa gita samrangko jakkalna nangani bidingo game ge·e cha·giparangna ma·siate on·na ia program-ko ong·atenga aro ia awareness program-ko re·baenggipa May 20 tarikona kingking, dingtang dingtang songrangoba ong·atangkugen ine KVK-ni official-rang u·iataha.
