TURA: Sipai dolrango kam ka·enggipa manderangni nokdangrangna kacharini kamrango nanga gita dakchakanirangko on·na, Veer Parivar Sahayata Yojana (VPSY) 2025-ni ning·o, dingtangmancha Legal Services Clinic-ko Tura-ni Zila Sainik Board office-o nokdonggae on·angaha.
Ia Legal Services Clinic-ko nokdonggana gita program-ko Tura-ni District & Sessions Court Complex-ni Conference Hall-o ong·atangaha aro ia tom·anio, West Garo Hills a·jani District & Sessions Judge aro DLSA-ni Chairperson AM Ripnar, District Legal Services Authority (DLSA)-ni Secretary IR Marak, Tura-ni Assistant Legal Aid Defense Counsel Jingjang Ch Marak, Zila Sainik Welfare Office-ni membor-rang aro Garo Hills-ni dingtang dingtang biaprango kamoni neng·take dongenggipa gitcham sipairang bakko ra·angaha.
Ia tom·anio, DLSA-ni Secretary IR Marak, rimchaksoani kattarangko aganangengon, kamoni neng·takgimin sipairangna aro uamangni nokdangrangna kacharini gita dakchakanirangko on·na nangani gimin aganangaha.
Ia tom·anio, District & Sessions Judge aro DLSA-ni Chairperson AM Ripnar-ba jinmana aganprakengon, NALSA Veer Parivar Sahatya Yojana 2026-ni ning·o ia Legal Services Clinic-ko kuliani bidingo talatanirangko on·angenba, ian sipairangnaa aro uamangni nokdangrangna dakchakanirangko on·na miksonge kuligipa nok ba office ong·a ine parakataha.
Ia tom·anio, Tura-ni Assistant Legal Aid Defense Counsel Jingjang Ch Marak-ba jinmana aganprakengon, VPSY 2025-ni bidingo aro ia scheme-ni namgnirangko jinmana agan-talate on·angskaaha.
