NH-217 ramako NHIDCL-na pakwataniko jegale Union Minister-na sedoa

BAGHMARA: Garo Hills-ni ramarangko name tarina gisiko nanggijagipa company ong·a ine matnangenba, Dudhnoi-oni Baghmara gita Dalu-ona dakanggipa National Highway (NH-217) ramako tarina National Highways Infrastructure Development Corporation of India (NHIDCL)-na pakwataniko jegale, South Garo Hills a·jani social acitivist Greneth M Sangma, Union Road Transport & Highways Minister-na sedoataha.
Iani bidingo Sangma, chittiko Bristibar salon Union Minister-na sedoataha.
“NH-217 (gitcham NH-51) project-ko NHIDCL-na pakwataniko chinga South Garo Hills a·jani manderang raken jegalenga maina ia NH-217 ramara, Assam-ni Dudhnoi-oni a·bachenge, Baghmara gita Dalu-ona dakanggipa rama ong·ani gimin chingna namen nangchongmotgipa rama ong·a. Batanggimin somoirango Garo Hills-ni ramarangko tarianio chinga kamrangko nikmanahani gimin NHIDCL-o ka·dongna man·jaha,” ine Sangma parakataha.
Tura-oni Dalu-ona NHIDCL-ni tarienggipa NH-51 ramani bidingo janapatengon, ia ramako NHIDCL matchote tariaha ine official-rangni report-rangode mesoka indiba ramako re·ange nigenchimode, official-rangni report-rango mesokaming melisrangja ine Sangma parakataha.
“Ia ramani bang·bata bakrangon name tarijani a·sel be·wakanirangko nikna man·enga aro bang·bata bakrangon matchotgija donchipengako nikna man·enga. Iakon uamang matchotaha ine a·kangenga. Ian NHIDCL-ni kamo gisik nanggijaniko mesokani ong·a,” ine Sangma parakataha.
Baghmara-oni Ranikor-ona NHIDCL-ni gital tarigipa ramakoba ua raken jegalataha.
“Ia ramako matchotaha ine report-ko on·a bakan ramani bang·bata bakrangon nosto ong·anirangko nikna man·aha. Ia ramako tarianio NHIDCL-ni jakkalgipa bosturangara namjani a·selsa mikkarang waanichi ta·raken nosto ong·pilaiaha. Ian manderangni tangka paisako indin bon·ata gita ong·aha,” ine Sangma parakataha.
Ia ramarangko tarianio NHIDCL-ni kamo gisik nanggijaniko mesokani ong·ahani gimin Dudhnoi-oni Darugre-ona rama apalatani aro Km 29 ong·gipa Tura Bypass project-ko NHIDCL-na on·kuaigenchimode dal·bea gualani ong·gen ineba Sangma parakataha.
Ramarangko tarianio NHIDCL-na batede NH Division-an nangani kri kamrangko ka·e on·a ine janapatengon, NH-217 project-ko NHIDCL-na on·gija State NH Division-on done kamko ka·atchina gita Sangma, Union Minister-ko didiataha.