SHILLONG: Meghalaya Muster Roll Workers Union-ni Joint Action Committee (JAC)-ni mingbonga dabiaoniko sorkari, mingbrikode ra·chakaha.
JAC-ni dabianirango Viriable Dearness Allowance (VDA)-ko bariatna, man·kugija dongenggipa dormahako watchina, retirement ba kamoni neng·takani bilsiko tik ka·na aro Meghalaya-o gital Labour Codes-ko ra·gatchina janapaha.
JAC-ni dabianirango chanchirimna Labour Commission Jagdish Chelani, April 29 tariko tom·aniko ong·ataha, jeon dingtang dingtang muster roll union-rangni representative-rang baksa agangrikangaha.
Uandake tom·anio chanchirima ja·man Labour, Employment and Skill Development department, May 1 tariko 2026-o VDA-ko bariatna notification-ko on·aha. Jeon ia bilsi 2026 April 1 tarikoni minimum wages ba hajirako bariatna aganaha.
VDA-ko jadokprakon Consumer Price Index (CPI)-o pangchake bariatjringa. Bilsi 2025 October jao negative CPI variation-ni a·sel VDA-ko bariatjaha ine officer talataha.
Indake Union-ni mingbonga dabianirangoniko mingbrikode ra·chakaha ine Sonibar salo Chelani parakaha.
“Bongagipa dabianikode jeon retirement age ba kamoni neng·takani bilsiko tik ka·na dabiachim ua mamlara High Court aro Labour Commissioner’s office-o dongenga. Indiba ta·raken ua mamlakoba nirokanggen.
Labour Commissioner-ni parakani gita, bilsi 10 ba una bate kam ka·enggipa Regular Casual Worker (RCW)-rangna casual workers status-ko on·china dabianiara Personnel Department-ni bilsi 1996-o Regular Casual Workers Scheme-ko parakatgipao napa unbaksana bilsi 2017-o on·gipa Office Memorandum-chi bilakdapataha.
Uandake kam ka·ani bilsi ru·utanio pangchake hajirako on·china dabiani bidingo talatengon, casual aro muster roll worker-rangni 4-tier structure wage-ko bilsi 2017 Office Memorandum-o parakaha. Uni gisepon je dabianirangko matchotkujaenga, uarangoba ta·raken chanchianggen ine ka·dongataha.
