‘AAMSU-ni dilgiparang kema bi·jaode rorirang GH-o napna man·jawa’: GSU
TURA: Meghalaya a·dokona, mongsongbate Garo Hills-ona re·bae bading chiwalgiparangko dingtang dingtang dolni manderang, doke sate watenga aro tom·tome bading chiwalna on·jaenga ine adita salrangna All Assam Minority Students Union (AAMSU)-ni matnange, Garo Hills-ona ma·manti bostu salbaenggipa garirangko aro bading chiwalanirangko champengna gita ka·mikkenataniko on·ahani gimin Garo Students Union (GSU) raken jegalatskaenba, ian AAMSU-ni tol·e matnangna jotton ka·anisa ong·aia ine parakataha.
GSU-ni parakatani gitade, re·anggipa March jao ong·anggipa obostara, NGO ba uandakgipa dingtang dingtang dolrangni kamrangsan ong·aija indiba Garo Hills-o songdongenggipa manderangni ka·a ding·chaoaniko mesokanisa ong·ahachim.
“Garo Hills-o Assam-oni re·bae bading chiwalenggipa manderangko dingtang dingtang dolrang, mongsongbate GSU-ni manderang, doke sate watenga aro bading chiwalako champengna jotton ka·enga ine AAMSU-ni matnanggipa kattarangko chinga raken jegala maina ia kamrangko GSU-mangmangsan ong·ja indiba A·chik jat gimiksa dakaha,” ine GSU-ni president Zikku Balgra N Marak parakataha.
Skang salrango gipin jatrang, Garo Hills-ni kona noksikrangona maming jajrengani grian re·rurae bading chiwalna man·aiachim ine janapatengon, mitam rori bading chiwalgiparang, ia cholko ra·e, A·chik me·chikrangko seke katna, rim·gittangna aro kragija kamrangko ka·na a·bachengahani giminsa A·chik jat ding·chaona a·bachengaha aro uni gisepon, adita salrangna skang, ACHIK dolni manderangko rorirang doke siatahani giminba A·chik jat ding·chaoe, gipin biaprangoni rorirangko A·chik a·songo bading chiwalna aro kamrangko ka·e cha·na on·jana tik ka·aha ine GSU president parakataha.
“Ia kamo GSU-mangmangsan ong·ja indiba A·chik jat gimikan bak ong·a. Ia a·sel ong·ani da·o namangpile tom·tomaniko man·pilengahaon, AAMSU-ni dilgiparang, Garo Hills-ni kosako economic blockade ka·na ka·mikkenatskaaha. Ian uamangni ding·chaoatanisa ong·enga aro uamangni GSU-ko dingtangmancha dosi chananiara kraani ong·ja,” ine Marak janapatenba, AAMSU-ni economic blockade ka·anina Garo Hills-ni manderang jajrengna nangjawa, batesa uamang an·tangtangnan gimaani ong·gen ine parakataha.
Iandakgipa ding·chaoatani kattarangko aganahani gimin AAMSU-ni president, GSU-o kema bi·na nanggen aro kema bi·jagenchimode rorirang, Garo Hills-o napna man·taijawa ineba GSU president mikrakataniko on·angaha.
“Rorirangni kamna A·chikrang ding·chaogenchimoba doke sate tangkarangko ra·a dongja batesa uamangko ka·sine agane watataia indiba rorirang, A·chikrangni me·su ra·bagiparangko rama tong·sao garirangko dongdipate bosturangko pale galaha. Assam-de AAMSU-mangmangni a·dok ong·ja indiba Assamese, A·chik Bodo, Karbi, Hajong, Koch aro dingtang dingtang jatrangniba ong·a. Uni gimin AAMSU, maming dakeba Garo Hills-ni kosako economic blockade-ko dakna man·jawa aro dakgenchimode uamangni kosakoba apsan daken economic blockade-ko dakangskagen,” ine GSU-ni president parakataha.
