Tura, May 2: West Garo Hills-oni bang·a ukilrang ba prosecutor-ranga batanggimin bilsi 2024-ni professional bill-rangko man·chipgija dongengani gimin jingjengatna tik ka·aha.
Tura-o kam ka·enggiparang Special POCSO Prosecutors, Additional Public Prosecutors (Addl. PP), aro Assistant Public Prosecutors (APP)-uamang man·a nanggnirangko man·gija dongenga. Iana prosecutor-rang suk ong·jae jingjengatna tik ka·aha. Uamangni parakani gita bilsi 2024-ni uamangni man·a nanggni professional fee-ko man·kujaenga, indake Special POCSO aro Additional Public Prosecutor-rangnaba tik ong·e uamangni fee-ko on·jaenga.
April 30 tariko tom·aniko ong·atange prosecutor-rang uamangni chagrongenggipa neng·nikanirango chanchirimaha. Jeon uamangni man·a nanggnirangko on·chipgija dongengani gimin suk ong·gijako parakna gita jingjengatna tik ka·angaha. Jakpongo gipok band-ko gane uamang jingjengatna tik ka·aha.
Uamangni jingjengatanichi court-ni aro case-ni kamrangko maming dakeba nangchakejawa ine aganaha. Indiba tangkarangko somoi gita aro tik ong·e man·jaengani a·sel uamang salantini janggi tanganio maidakgipa neng·nikarangko chagrongna gita nangenga iarangko mesoknasa jingjengatna tik ka·aha ine talataha.
