SHILLONG: Batanggimin March jao, Garo Hills Autonomous District Council (GHADC) election-o gipin jatrangni bak ra·paaniko jegalengmiting somoio, so·sojengjeng ong·anirangna Garo Hills-o dingtang dingtang dolni dilgiparangko rim·anina Tura-ni MDC aro Bharatiya Janata Party (BJP)-ni state vice president Bernard N Marak, National People’s Party (NPP)-chi dilenggipa MDA sorkariko matnangataha.
Ia so·sojengjeng ong·ani bidingo, Phulbari-ni gitcham MLA GS Esmatur Mominin aro GHADC-ni gitcham MDC Sofior Rahman-ko rim·aniko janapatengon, uamangko rim·ani bewal aro uamangni kosako ka·gipa case-rangni bidingo Marak, Meghalaya sorkariko sing·doataha.
GHADC election-o gipin jatrangni bak ra·paaniko jegalenggipa dingtang dingtang dolni dilgiparangko rim·anina Garo Hills-o songdongenggipa manderang suk ong·tokjaenga aro kenchakanirang batroroenga ineba Tura-ni MDC parakataha.
Marak-ni parakatani gitade, rim·a man·gipa dingtang dingtang dolni dilgiparangko adita salrangna skangsan, Garo Hills Peace Forum-ni ning·o dingtang dingtang mondolini dilgiparang grongeaha.
Ia a·selni bidingo adita sak chadamberangko rim·anina da·o name nipiltaianirangko dakengaha ine janapatengon, ia chadamberangko rim·anina bang·a manderangan suk ong·tokjaenga ine Marak parakataha.
GHADC-o NPP baksa da·o bakrimenggipa MDC sakgni, chong·motan Cherak W Momin aro Rinaldo K Sangma-koba ia so·sojengjeng ong·anio chakpaaniko on·anina rim·na miksonganirang dongachim ine kobor on·gipani bidingo janapatengon, ia MDC sakgnini kosakoba apsan ja·kurangkon de·genma ine Marak sing·doataha.
