A·king ning·o gittimko dilgiparangni tom·aniko aro Assam Schedule patta on·aniko Nokma jegala

TURA: A·arangko ra·chengani gri aro tangka paisarangko gamchengani gri, GAD-ni a·a ine sorkarini a·kangenggipa dingtang dingtang gittimko dilenggipa president aro secretary-rangni tom·anirangko Danakgre A·king Nokmani demechik Amanche Marak jegalatenba, ian Constitution-ni Sixth Schedule-o on·gimin niamrangko pe·ani ong·enga ine parakataha.
Iani bidingo West Garo Hills a·jani Deputy Commissioner-na badi ka·e sedoatengon, ia a·ani case da·ob a Meghalaya High Court-o matchotkujaenga aro ia case-o Deputy Commissioner aro Additional Deputy Commissioner (Revenue)-an kachario aganchakna nanggiparang ong·achim ine Marak parakataha.
“Ia case da·o kacharini jako ong·kuengon, sorkarini on·nagipa Assam Schedule patta-na jolo songdongenggipa manderangko tangka gamchina DC office-oni ge·etenga. Sixth Schedule a·jaode a·arang, Nokmani nirok simsakanio Maharinisa ong·a aro ia bilko Constitution-ni Sixth Schedule ning·o, a·dok sorkari aro rorirangoniko warachakna on·aha. Ia niamko ma·sieba maini gimin niamni a·palo ong·gipa a·a pattarangko ra·chakna ching A·kingni ning·o donggipa manderangko nang·ni office ge·etskaenga?” ine A·king Nokmani demechik sing·doataha.
Scheduled a·jarango Assam Schedule ning·o a·a pattarangko a·dok sorkarini on·engani giminba ua sing·doataha.
“Nokmani ning·o donggipa a·arangoniko sorkari niam gita kajinarangko gilna man·ama? Badia niamni ning·o Nokmani a·arangna, jolo songdongenggtipa manderangko indita tangkarangko gamchina ge·etanga? A·king ning·o dingtang dingtang development committee-rangko songahani gimin aro a·dokni ning·o biming segatahani gimin chinga badi ka·aha. A·kingni a·arango Nokmani NOC gri development committee-rangko chalaianiara niamni a·palo ong·a,” ine A·king Nokmani demechik parakataha.
Iandakgipa development committee-rangde namroro silroroani kamrangko nirokanisan ong·aia aro jatni sason ka·ani kamrango jak on·pana bil dongja ine janapatengon, “Iandakgipa kamrango jak on·jachina mol·molatani ja·manba development committee-ko dilenggiparang, jolo songdongenggipa manderangko iandakgipa kamrango sason ka·na jotton ka·kuenga. Uni gimin Scheduled a·jarango Nokmarangna on·gimin bilko pe·jachina aro kachario case ong·kuengon, manderangna a·a pattarangko on·na gita tangka paisarangko dabijachina chinga changsataie mol·molatenga,” ine Marak parakataha.