SHILLONG: 2028 bilsini Meghalaya Assembly election ja·man Bharatiya Janata Party (BJP), gital sorkariko rikgen ine a·kanganiko Congress dolba jegalataha aro BJP-ko Meghalaya-o aro salgro salaramni bang·bata a·dokrangon manderang ra·chakna man·tokkujaenga ine parakataha.Ia bilsini Assam aro West Bengal Assembly election-o cheani ja·man 2028 bilsio Meghalaya a·dokoba sorkariko rikna man·gen ine BJP-ni a·kanganiko jegalatengon, gipin biaprango cheaiani gimin Meghalaya a·doko BJP, sorkariko rikna man·gen ong·ja ine Congress dolni dilgipa Manuel Badwar parakataha.
Meghalaya a·doko manderangni janggi tangani aro politics-de gipin a·dokrang gita apsan ong·ja aro BJP-ni bebera·ani baksa melija ineba Badwar aganaha.
Election-rango chena gita pangnan BJP, sorkarini cholrangko jakkalronga indiba Meghalaya a·dokode ian altua ong·jawa ineba ua aganaha.
Kerala aro Tamil Nadu gita dakgipa a·dokrango toe janapatengon, India a·songo BJP-ni bewalrangko jegalgipa manderang bang·en dongkuenga ine Congress dolni dilgipa parakataha.
Assam-o Congress dolni chena man·jahani gimin janapatengon, West Bengal a·dokoba Congress, bilakna gita man·chipkujaenga ine election-na skang bakrimna jechakahani gimin Badwar, All India Trinamool Congress (AITC)-koba matnangataha.
Ia sal somoirango regional party-rang bang·en nakatbaengahaoba national party-rangonide Congress dolmangmangsa mikkang niteani gri kamko ka·gipa party ong·kuenga ineba ua aganaha.
Badwar-ni aganani gitade, batanggimin somoirango Congress dol, Meghalaya a·doko bilgriatako man·ahaoba da·o ka·sinsin bilakbana a·bachengpiltaiengaha.
2028 bilsini Assembly election-na tarisamsoanio Congress dol, onbatgipa gadangonin ka·sinsin party-ko rikna a·bachengpiltaiengaha ineba ua aganaha.
Adita salrangna skang ong·atanggipa Assam aro West Bengal a·dokni Assembly election-rango party-ni chu·sokgipa ong·aniko nikna man·ahani gimin re·baenggipa 2028 bilsini Assembly election-ni ja·mande Meghalaya a·dokoba BJP sorkariko rikgnok ine BJP Meghalaya-ni dilgiparang a·kangatahachim.
Meghalaya a·doko da·o ong·enggipa MLA aro MDC-rangko man·chape bang·a dilgiparangan BJP-o napna miksongtokenga ineba BJP-ni dilgipa AL Hek a·kangatahachim.
