TURA: Bristibar salo, A·chik National Volunteers Council (ANVC) aro ANVC-B-ni gitcham dilgiparang, Transport department-ni official-rang baksa Jengjal-o donggipa Baljek Airport-ni obostarangko niangaha.
Gitcham ANVC aro ANVC-B dolrangni u·iatani gitade, Baljek Airport-ona re·ange obostarangko niangan baksana songni manderango sing·sandianirangko dakon, ia airport-ni runway-ko bakrodape tarina gita gittamgipa bako ra·gimin a·arangna tangka paisarangko sorkari gamkujaenga ine songni manderang u·iataha.
“Ia Baljek airport-ni runway-ko bakrodapatna gita ra·gimin a·arangna tangka paisarangko gamchipkujaengani gimin a·a nokgiparang suk ong·gijaniko paraktokaha aro tangka paisarangko ta·raken gamchina didiataha. Uni gimin chinga iani bidingo ta·raken nangchakegipa department aro official-rangna chu·gimik report-ko tarie on·gen,” ine ANVC-B dolni gitcham chairman aro Tura-ni MDC Bernard N Marak, kobor ra·timgiparangna parakataha.
Baljek Airport-ni kamrangko ta·raken a·bachengna man·na gita a·a nokgiparangna tangka paisarangko ta·raken gamna nanga aro bangki kamrangkoba ta·raken matchotatna nanga ineba Marak aganaha.
2014 bilsio ANVC aro ANVC-B dolrangni ma·mong aro a·dok sorkarirang baksa songgigrikanio ku·rachakgimin gitan Garo Hills-o dingtang dingtang project-rangna bang·en tangka paisarangko watataha ine ma·mong sorkarioniko kobor man·soahani gimin ia salni bako uamang, dingtang dingtang project-rangko niangaha ineba ANVC-B dolni gitcham chairman parakataha.
Marak-ni parakatani gitade, Baljek Airport-na agreba uamang, Integrated Health Complex, Sub-Divisional Hospital, Commercial Market aro Sub-Division office-ni biaprangkoba niangaha.
Project-rangoni bang·batan da·o bimang ong·engaha ine dingtang dingtang department aro official-rangko mittelpilangengon, Baljek Airport-ni je rikmangimin nokrango mitam manderang, kelki glass-rangko dokpruaha, gital rikgipa noko ringe cha·e botolrangko skatang gala aro mitam biaprango ki·e donanganiko nikna man·a ine Marak, an·tangni suk ong·gijaniko parakataha.
“Ian an·ching songni nokni manderangna janggi tangani cholrangko on·nagipa gam-jinrangsa ong·achim indiba iandakgipa biaprangko nosto ka·aniara namen kragijani ong·a,” ine Tura MDC parakatenba, iandakgipa project-rangko nosto ka·e galna man·jana gita an·tangtangan nirok sandichina aro nokrangko name rakkichina songni nokni manderangko didiataha.
