TURA: East Garo Hills a·jani, Rongjeng jolo songdongenggipa manderang, Rongjeng Bajar Committee-ko seokanio political-ni a·bao ong·gipa dolrangni bak ra·paanina suk ong·gijaniko parakangaha.
Ia Committee-ara, jolo songdonggipa manderangni namnikpaanio jolni Nokma Sardar-rangni dakchakpaanichi a·bachengatgipasa ong·a. Uni gisepon, seokako man·gipa dilgiparang an·tangtangan office-ni dingtang dingtang kamrangni gadangrangna rimnapaniko dakenganiara kragijani aro jatni dakbewalo ja·rikbaenggipa Nokma-rangni jako on·gimin bilrangni kosako re·ani ong·a unbaksana jolni bading-chiwalenggipa manderangni ku·mong nangrimo re·mikkanganiko dal·e ra·gijani aro bilgriataniba ong·a ine jolni NGO-rang parakaha.
Indake ong·engon, Indian Constitution-ni Sixth Schedule-ni ning·o on·gimin niamrangni gita, songsalni manderangni bilrangko chel·chake rakkianina, jolni dingtang dingtang nanggipa kamrangko sorkari official-rangchi maming bak nangatgija, jakgitele chalaina man·aniara nangchongmotgipa ong·a ine janapengon, jatni dakbewalko ja·rike songsalko chalaianio aro jatni bilrangko rakkianio jolo songdonggipa manderang raken chakpaenga ineba NGO-ni dilgiparang talatangaha.
Una agreba, Rongjeng songni dilgiparang aro Nokma Sardar-rang, Garo Hills Autonomous District Council (GHADC)-ni ning·o ong·gipa a·arang aro bading-chiwalgiparangni kosako rakgipa ja·kurangko de·china didienba Meghalaya Benami Transations (Prohibition) Act-ko ra·gatpachina aro niamgri a·doko songdongenggiparangko am·sandichina, niamgri Non-tribalrangna a·arangko palgiparangko den·galpilchina dabiangaha. A·doko trading licene donggija niamgri bading-chiwalenggipa rorirangni kosako champengchina, GHADC-ni gita joint inspection-ko dakchina aro a·doko ka·enggipa rika cho·ani kamrang, jedake NH-217-o kam ka·enggipa rorirangrangni kosako nambata nirokaniko dakchina gitaba dabiangaha.
Unomitingo, A·chikrangni bilrangko chel·chakanina, niamrango pangchake rakgipa ja·kurangko de·china mol·molan baksa, “A·dok chigako aro jatni bewalrangko chel·chake rakkianiara, songsalo tom·tomani aro ku·mong nangrimaniko rakkina nangchongmotgipa ong·a,” ine nangrimgimin NGO-rang parakataha.
