EGH-ni Darugre Nengbrok skulo skigipa saksan ong·e neng·nikaniko man·enga

RONGJENG: East Garo Hills a·jani Rongjeng jolo donggipa Darugre Nengbrok Government LP skulo skigipa saksan ong·e, bi·sarangna lekka porako on·anio neng·nikanirangko chagrongna nangenga ine kobor on·aha.
Kobor on·timgiparangni u·iatani gitade, ia skulni sakgipin skigipa, re·anggipa 2025 bilsini September jaon kamoni neng·takangaha indiba da·onan ia skulna skigipako rakkidapkujaengani a·sel da·o ia skulo skie on·enggipa saksasan ong·e, bi·sarangna lekka porako on·anio neng·nikanirangko man·na nangengaha.
Ia Darugre Nengbrok Govt LP skulara, India a·songni jakgitelaniko man·na skang, 1942 bilsion kuligipa skul ong·a aro ian Rongjeng jolo donggipa junior basic skul damgnioni damsa ong·paengachim. Batanggimin bilsirangode ia skulo poraigipa bi·sarang, sak 120 batpilachim indiba re·anggipa bilsio skigipa saksa kamoni neng·takangani ja·man da·o skigipa saksansa skulni bi·sarangna skie on·na nangengani gimin ia skulo poraigiparangba da·o sak 61-mangsan dongaiaha ine kobor on·timgiparang parakataha.
Ia skulni apsan compound-on upper primary (UP) section-ba donga aro ia UP section-ode chatro chatrirang sak 29-mangsan dongaia indiba skigiparangde sakbri dongskaa ine kobor on·timgiparang u·iataha.
Koborko on·ani gitade, da·o ia LP skulo skie on·enggipa mandeba, adita jarangni gisepon kamoni neng·takani ong·engahani gimin ia skulna ta·raken skigiparangko rakkijagenchimode mikkangchi ia skulo poraigipa bi·sarang, neng·nikanirangko chagrongbatna siengaha.
Ia skulni sakgipin skigipa, re·anggipa bilsio kamoni neng·takangani ja·man, ia skulna skigipako rakkidapchina gita skigipa an·tangan Williamnagar-ni education office-ona re·ange aganeahachim indiba da·ona kingkingan skigipako rakkidapkujaenga ine parakataha.
“Skanggipa angni office-ona re·angchengani somoiode uamang skigipako rakkina kam ka·engaha ine aganaha. Gnigipa re·angode baditaba jarang nangkugen ine angna aganataha indiba gittamgipa re·angtaiode angko seachi badi ka·china uamang aganskaahani gimin anga office-ona an·tangan see donbaaha,” ine skulni skigipa aganaha.
Ia skigipani parakatani gitade, ua ia skulo class ge·dokni bi·sarangna skie on·na nangan baksana gipin kamrangkoba nirokna nange, neng·nikanirangko chagrongna nangenga.
Indake ong·engon, ia jolrango donggipa bi·sarangna a·gilsakni seng·aniko on·angkuna man·na gita ia skulna skigipako rakkidape on·china Garo Students Union (GSU) Mangsang unit-ba sorkario dabiangaha.