WILLIAMNAGAR: Garo Hills-ni Constitutional Rights Forum (CRF)-ko dilenggipa manderang, Sonibar salo, East Garo Hills a·jani Williamnagar-o donggipa Tourist Lodge-o tom·aniko ong·atangenba, jatna aro a·songna nambate dangdike on·na miksonganio gital dilgiparangko rimdape, A·chik Society for Ownership of Native Grounds (ASONG) dolko bikotaha.
ASONG-ko dilenggipa manderangni u·iatani gitade, A·chik a·song aro jatni namgnina nambate kamrangko ka·na man·na gita ia dolko Central Executive Council (CEC), Regional Unit-rang, Units-rang aro Sub-Unit-rang baksa chalaianggen.
CRF dolni gita kacharini kamrang, sorkarini kamrang aro uandakgipa dingtang dingtang kamrangko jako ra·e ka·anggen aro ASONG dolni gita Garo Hills-o songdongenggipa, mongsongbate A·chikrangni namgnina CRF-ni agan-ku·pattianirango pangchake kamrangko ka·angskagen ineba dilgiparang u·iataha.
