Social media-rango ‘tol·gipa’ koborrangko champengna nangenga: IPR Minister
SHILLONG: Ia sal somoirango, YouTube aro uandakgipa social media-rangko jakkale, ‘tol·gipa’ koborrangko giproroatanirang batroroengani gimin iandakgipa kamrangko champengchina aro skango jekai kakketko am·sandie koborko on·achim, apsan dakgipa bewalkon ja·rikangkuchina gita a·dokni Information & Public Relations (IPR) Minister Lahkmen Rymbui, Sonibar salo, World Press Freedom Day-ko manianio, a·dokni journalist-rangko didiangaha.
Ia World Press Freedom Day-ko manianio, Tura-ni gitcham Lok Sabha MP aro Meghalaya State Commission for Protection of Child Rights (MSCPCR)-ni Chairperson Agatha K Sangma, DIPR-ni Director BS Sohliya, department-ni gipin official-rang, Shillong Press Club, Meghalaya Editors & Publishers Association (MEPA) aro Tura Press Club-ni member-rangba bak ra·angtokaha.
Internet-ni chasongo tol·gipa koborrangko giproroatanirang batroroenganian journalism ba manderangna koborrangko on·na kam ka·anio mingsa rakbegipa ra·biani ong·enga ine janapatengon, Meghalaya a·doko da·oba koborrangko on·anio jakgitelen kamko ka·na man·engkua ine Rymbui parakataha.
Meghalaya a·doko skang chasongrangonin manderang jakgitele an·tangtangni nangnikanirangko aganna man·aia ine janapatengon, da·oba sorkari aro media-ni gisepo meli-nangrimgrikaniko rakkina man·engkua ine IPR Minister aganaha.
COVID sajinmani ja·man social media-rango ong·gija aro tol·gipa koborrangko watani batroroahani gimin journalist-rangni kamrangko ka·anio namen simsakbatna nangengaha ineba Rymbui aganaha.
India aro a·gilsakni gipin biaprango media-rangko champengani gimin janapatengon, Meghalaya a·dokode darang sorkariba media-ko politics-ni gita man·gnina jakkala dongkuja ine IPR Minister aganaha.
Koborrangko taridapani gri pangnan kakketkosa on·chinaba ua a·dokni journalist-rangko ku·pattiangaha.
“Saoba kakketko taridape kobor on·ahaon, unonin neng·nikaniba a·bachengrongaia,” ine ua aganaha.
Ia World Press Freedom Day-ko maniani bak gita Protection of Children from Sexual Offences (POCSO) case-rangni bidingo report on·ani giminba jinma chanchirimangaha aro ia chanchirimanio, SCPCR-ni Chairperson Agatha K Sangma aro gipin expert-rang, journalist-rangna agan-talatanirangko on·angaha.
