RONGARA: South Garo Hills a·jani Rongara songo, CERC scheme 2022-2023-ni ning·o World Bank-ni dakchakanichi suspension footbridge ba ja·achi re·ani dolongko name tarijahani a·sel da·on nosto ong·na a·bachenge, dolong gita re·ruraenggiparangna, mongsongbate chatro chatrirangna kenchakna nangani ong·enga ine Garo Hills Youth Solidarity (GHYS) Rongara unit parakatenba, iani bidingo Meghalaya Lokyukta-na badi ka·doataha.
Ia footbridge ba jal·langko name taripiltaichina gita re·anggipa February jaosan GHYS-ni dilgiparang, ia kamko ka·gipa contractor-rangko didiatahachim indiba da·alona kingkingan ia jal·langko taritaipile on·kujaengani gimin contractor-rangni kosako Lokayukta-ni kacharina badi ka·doangaha.
GHYS Rongara unit-ni president Barthazar G Momin-ni u·iatani gitade, ia Suspension Footbridge ba ja·achi re·gipa jal·langara, Rongara-ni Rongdi chiringko kabatgipa jal·lang ong·achim indiba ia jal·langko name tarijani a·sel aro namgipa bosturangchi tarijahani a·sel ia jal·lang ta·raken nosto ong·piltaiahachim.
Ia jal·langko tarina gita 2022-2023 bilsini gisepo gong lak 20 tangkarangko chamatahachim ine janapatengon, ia jal·langko Detailed Project Report (DPR)-o dongimin niam gita tarijaha aro namgipa bosturangko jakkaljahani a·sel ia jal·lang, ta·raken nosto ong·piltaiaha ine GHYS Rongara unit-ni president, Lokayukta-na badi ka·doataha.
Meghalaya Lokayukta-na badi ka·doanganio GHYS, ia kamko ka·na contract-ko man·gipa mande, Rongara Block-ni BDO aro Baghmara Border Areas Development Office (BADO)-ni official-rangkoba biming mingaha.
Manderangni namgnina sorkarini chame on·atgipa tangka paisarangko jakkalsretani a·sel ia jal·lang bakan nosto ong·piltaiaha ine matnangatengon, ia kamo jak donggipa contractor aro official-rangni kosako nanga gita ja·kurangko de·china aro mikkangchi iandakgipa a·selrangko champengna contractor-ni registration-ko den·galchina GHYS Rongara unit-ni president, Lokayukta-ko didiataha.
“Ia dolongara, songni manderangna, mongsongbate skulrangchi re·enggipa bi·sarang, jekai RMSA School Rongara, Rongara Government U.P. School, Rongara Dobakol L.P. School, Rongtotma L.P. School, aro Rongtotma Green Bale English School-ni chatro chatrirangna namen mongsonggipa re·a doani chol gita ong·engachim. Skulo poraienggipa bi·sarangsan ong·aigija, songni manderang, sagipa manderangkoba ia dolong gitan ra·rurana nangtokpaengachim,” ine GHYS janapatenba, ia dolongko rika matchota bakan nosto ong·na a·bachengpiltaiahani gimin ia songni manderangna aro skulrangchi re·enggipa bi·sarangna kenchakna nangani ong·enga ine parakataha.
