SHILLONG: East Jaintia Hills a·jani koela a·dam damsao, mande saksani manggisiko man·taiaha ine police official-rang kobor on·aha.
Police official-rangni u·iatani gitade, ia manggisiko, Moolait Bri Sumer-o donggipa koela a·kolo chio balboe dongakosa man·aha aro ia mande, koela a·kolo sripe siakon ine chanchichipenga.
Ia koela a·kol bewalan tu·a aro ia a·kolo chi gapani gimin manggisiko ra·ongkatna man·kujaenga ine Sonibar salo, East Jaintia Hills a·jani Superintendent of Police (SP) Pankaj Kumar Rasgania parakataha.
Ia manggisiko ra·ongkatna gita ia koela a·damona State Disaster Response Force (SDRF)-ni sipairangko okamataha ineba SP parakataha.
Re·anggipa February jaoba, East Jaintia Hills a·jani Mynsyngat-Thangsko jolo, niam gri chalaienggipa koela a·dam rang·san gopretanichi, sak 32 manderang sina nangahachim aro baditaba sak manderang, saknaanirangko man·na nangahachim.
Ia a·sel ong·anina police-rang, koela a·damni nokgipa sakbriko rim·ahachim.
Meghalaya a·dokni dingtang dingtang koela a·kolrango, niam gri koelarangko bikotengani a·sel bang·en manderangni sianirangko nikna man·engaha indiba da·alonan niam gri koela bikotaniko champengna man·kujaengachim.
