SRP-ni bidingo tom·anio bak ra·pajania VPP-ni gisik nanggijaniko mesoka: BJP

SHILLONG: Re·anggipa antio, State Reservation Policy (SRP)-ni bidingo Expert Committee-ni on·gipa report-ko nipiltaie apsan chanchirimna gita pilak political party-rangni tom·anio bak ra·epajahani gimin Voice of the People’s Party (VPP)-ko Bharatiya Janata Party (BJP)-ba matnangataha.
Reservation Policy-ko nipiltaichina dabigipa dolrangoni VPP-ba dolsa ong·a indiba iani bidingo political party-rangni chanchirimna tom·aniko ong·ataniode bak ra·eskajahani gimin VPP-ko BJP-ni dilgiparang matnangataha.
Expert Committee-ni report-ko nipiltaie apsan chanchirimna gita sorkarini ong·atgipa tom·anio VPP-ba bak ra·epana nangachim ine janapatengon, Reservation Policy-ko nipiltaichina dabie jingjengatanirangko dakahaoba ia tom·anio bak ra·epajaniara VPP-ni gisik nanggijaniko mesokanisa ong·a ine BJP-ni state general secretary Wankitbok Pohshna parakataha.
Assembly session-ko ong·atanio Reservation Policy-ni bidingo chanchirimna somoiko chu·onga gita on·jaha ine VPP-ni matnanganina aganchakaniko on·angengon, pilak party-rangni tom·aniko ong·atanion an·tangtangni chanchianirangko ba nangnikanirangko u·iatna aro chanchirimna gita tom·aniko ong·attaichina dabina gitaba cholko on·ahachim ine Pohshna aganaha.
Mande jelbra jelsuanio pangchake reservation policy-ko tarichina VPP-ni dabigipani gimin sing·doatengon, Expert Committee-ni ku·pattianirangko on·na skangba pilak niamrangko aro Supreme Court-ni rai on·anirangko nichengesa on·aha ine BJP-ni state general secretary talataniko on·angaha.
Expert committee-ni report-o maiba chu·ongnikgijani ba suk ong·nikgijanirang donggenchimode uko political party-rangni tom·anio aganna ba u·iatna chol ong·ahachim ineba ua aganaha.
Iandakgipa a·dokni nangchongmotgipa kamrangni bidingo jingjengatanirangko dakana bate, a·songni niam bidiko pangchake apsan chanchirimaniko dakna man·osa nambata ineba Pohshna aganaha.
Pilak party-rangni tom·aniko ong·atanio bak ra·epajahani gimin dingtang dingtang dolrang aro sorkariba VPP-ko matnangtokengon, Assembly session-o chanchirimna somoirangko chu·onge on·jahani gimin VPP, sorkariko matnangatskaahachim.
Reservation policy-ko mande jelbra jelsuanio pangchake tarichina dabiangkuengon, iandakgipa kamrangni gimin chanchirimnade Assembly-sa nambatgipa biap ong·a ine VPP-na ku·wattimgipa AW Rani parakatahachim.