TURA: Garo Hills Autonomous District Council (GHADC)-o kam ka·giparangna da·alona kingkingan uamangni account-ona dormaharangko chipatkujaenga ine Sombar salo, Tura-ni MDC aro Bharatiya Janata Party (BJP)-ni state vice president Bernard N Marak parakatenba, kam ka·giparangna ta·raken dormahako chipatchina a·dokni Deputy Chief Minister aro District Council Affairs (DCA) Minister Prestone Tynsong-ko didiataha.
Marak-ni DCA Minister-na sedoatgipa chittio parakatani gitade, ANVC aro ANVC-B dolrangni songgigrikanio aro re·anggipa September 26 tariko State Level Monitoring Committee-ni tom·anioba, GHADC-o kam ka·giparangna somoi gita dormaharangko on·na tik ka·ahachim indiba ia songgigrikaniko chu·sokatjaniara, sorkarini kakket ong·gijaniko mesokani ong·enga.
“Songgigrikanio ku·rachakgiminko mande ra·na nanga maina GHADC-o kam ka·giparangni dormaharangko somoi gita on·janiara, bang·a nokdangrangni janggi tanganio neng·nikaniko ra·baan baksana sorkarini ku·rachakanio ka·donganiko ra·ongalani gita ong·a,” ine Tura MDC parakataha.
GHADC-o kam ka·giparangna somoi gita dormahako on·janiara, kam ka·giparangni jingjengatengmiting somoio Peace Committee aro Sub-Committee-ni kam ka·giparangna ka·dongataniko on·anio togia gita ong·a ineba Marak parakataha.
“GHADC-o kam ka·giparangna escrow account gita dormaharangk o on·na ku·rachakahani gimin kam ka·giparang aro uamangni nokdangrang, ia ku·rachakanio ka·dongengani gimin ia ku·rachakaniko chu·sokatchina chinga nang·ko mol·molenga,” ine Marak, a·dokni Deputy Chief Minister aro DCA Minister Prestone Tynsong-na sedoatgipa chittio janapataha.
