Kam ka·giparangko chu·onge man·ode Tura Medical College-ko 2027-oni kuligen

SHILLONG: Kam ka·giparangko, mongsongbate skie on·giparangko chu·onga gita man·genchimode, Tura Medical College-koba re·baenggipa 2027 bilsionin kulie, course-rangko a·bachengna man·gnok ine a·dokni Health Minister Wailadmiki Shylla parakataha.
Health Minister-ni parakatani gitade, Tura Medical College-na qualify ong·gipa skigiparangko aro kam ka·giparangko man·na neng·ani ong·gen ine niksamsoani giminan ia medical college-ko public-private partnership (PPP) mode-o chalaina sorkari tik ka·chengahachim indiba iako dingtang dingtang dolrang aro a·doko songdongenggipa manderangba jegaltokahani gimin sorkari an·tangan college-ko chalaina tik ka·aha.
Shillong Medical College-o da·o dipet sak 50 chatro chatrirangsan dongaia aro iako chalaianion skigiparangko man·na neng·ani ong·ahani gimin Tura Medical College-ode sak 150 chatro chatrirang donge, skigiparangko man·na neng·batani ong·gen ineba Shylla aganaha.
Tura Medical College-ni dingtang dingtang kamrangna advertisement ba u·iatanirangko on·manaha aro course-rangko mikkang bilsionin a·bachengna sorkari ka·dongenga ineba Health Minister parakataha.
“Kam ka·giparangko chu·onga gita man·genma man·jawa da·o dipet name aganna man·kujaenga indiba Tura Medical College-ni academic session-ko sorkari, mikkang bilsionin a·bachengna miksongenga,” ine ua aganaha.
Shillong Medical College-ode re·anggipa bilsionin course-rangko a·bachengaha aro ia college-ko da·o dipet Lawmali-o donggipa Pasteur Institute aro gipin health institute-rangoni chalaienga ine nikna man·a.
Health Minister-ni parakatani gitade, adita salrangna skangsan ua Chief Minister Conrad K Sangma-ko gronge Shillong Medical College-na nokrangko rikani bidingo agangrikaha aro nokrangko dingtang dingtang bak dake rikgen ine ua Chief Minister aganataha.
“Ian brownfield project ong·ani gimin nokrangko bang·en nanga indiba da·o skanggipa bilsinade chinga jedakeba choliatenga,” ine Shylla aganenba, nokrangko rikna gita detailed project report (DPR)-rangko tarichina Chief Minister ge·etaniko on·ataha ine parakataha.
Shillong Medical College-ko nokchakenggipa Shillong Civil Hospital-ko dal·batatna gita biaprangko wate on·ahani gimin a·dokni Health Minister, Lady Kerr Welfare Centre-koba mittelpilangaha.